تريندات تيك توك تقريبًا كده مالهاش نهاية، كل شوية نشوف حاجة مختلفة عنه سواء سلبية أو إيجابية، أبليكيشن عامل دوشة من ساعة ما ظهر، والمرة دي، القلق على invitations لناس ماحملوش الأبليكيشن قبل كده، علشان تكسب فلوس من خلال دعوتهم عن طريقك، من فترة سمعنا عن إنك لو عملت دعوة لشخص ماحملش التيك توك على تليفونه قبل كده وحمله من الدعوة بتاعتك بلينك خاص بيك، هيتضاف في حسابك حوالي 180 جنيه تقريبًا، ووقتها انتشر الهزار على إن الناس خلاص شايفين بعض عبارة عن invitations، دلوقتي كل ما نفتح السوشيال ميديا نلاقي ناس بتتكلم عن 900 جنيه من تيك توك، سواء بيبعتولك اللينك علشان يكسبوهم، أو ناس بتتريق على الفكرة.
طرق مختلفة للدعايا لأبليكيشن تيك توك، وعلشان ينتشر بشكل أوسع ويحمله أكبر عدد ممكن من الناس، ولما يحملوه، يتفرجوا على أكبر عدد ممكن من الفيديوهات، لإن حتى عدد الفيديوهات اللي بيتم مشاهدتها بتجمع نقط وتكسب من خلالهم، فكل شوية نلاقي طريقة مختلفة، وكلهم بيثيروا جدل. عادي لو حد ماتكلمتوش من سنين تلاقيه بيكلمك علشان يبعتلك اللينك ويجمع نقط وفلوس من خلال الدعوة دي، والحقيقة إن الموضوع ده عامل جدل ما بين الهزار والجد.
مصر كلها بتفرك عشان 900 جنيه ?
Posted by Ahmed Maher on Sunday, August 22, 2021
وغير الهزار، انتشر تساؤل عن هل التربح من تيك توك والفلوس دي حلال؟ دار الإفتاء قالت رأيها في الموضوع ده بشكل صريح ردًا على سؤال في بث مباشر على فيسبوك، وأجاب على السؤال الشيخ عويضة عثمان، مدير إدارة الفتاوي الشفوية وأمين الفتوى بدار الإفتاء المصرية، وقال: “على حسب ما يقدم في هذا، فهناك شيء هادف وشيء يحث على الأخلاق ويساعد على انتشار الفضيلة، سواء كان معلومة مفيدة دينية أو دنيوية، وهناك أشياء خارجة عن العادات أو التقاليد أو الأدب أو تحض على الحرام. إذا كان المعروض من قبيل الأشياء المباحة والحلال والتي تحث على الأخلاق وتقدم معلومات مفيدة دينية أم دنيوية فما يأتي منه حلال أما إذا كان غير ذلك فحرام”.