فاكرين أول مدينة مصرية في الميتافيرس؟ ميتاتوت اللي تم افتتاحها على افتراض إن الملك توت عنخ آمون رجع للحياة تاني في 2022، علشان يكمل أحلامه في مصر ولكن من منظور افتراضي، ومعاها هتسمع التاريخ وتشوف حكايات عن مصر القديمة، ومش بس كده، كمان تقدر تعرض منتجات لك والناس تشتريها من المدينة.
ميتاتوت هتكون على معاد مع أول حفل غنائي بلغة الفراعنة (اللغة المصرية القديمة) تحت عنوان “الحب لغة كونية” بمناسبة احتفالات العام الميلادي الجديد، وافتتاح قصر نفرتيتي يوم 28 ديسمبر 2022، اللي بيضم الأزياء المصرية والتصميمات الفريدة واللوحات الفنية، واللي هييحي الحفل السوبرانو المصرية أميرة سليم، اللي شاركت في حفل موكب نقل المومياوات، ولفتت الأنظار وقتها بأدائها الثابت وحنجرتها القوية.
مروت آك
السوبرانو اتكلمت عن تفاصيل الأغنية اللي هتغنيها تحت عنوان “مروت آك” أو “حبك”، وبتندرج تحت نوعية الأغنيات الرومانسية، لإنها متاخدة من القصائد الرومانسية من برديات الفراعنة، واللي بتحمل رسالة الملكة نفرتيتي للعالم بالحب والود والرحمة، وطبعًا زي ما احنا عارفين، قصة حب نفرتيتي وأخناتون كانت أعظم قصة حب في التاريخ القديم.
أميرة بتقول إن الجمهور هيلاقي في الأغنية مزيج بين الموسيقى الكلاسيكية والغناء بلون ولغة قديمة، وفخورة إنها حاملة رسالة الملكة نفرتيتي أشهر ملكات مصر القديمة، وأكثرها قوة وغموضًا من خلال اللغة الكونية (الموسيقى) وعلشان يخلقوا حالة تعيشك في عالم أجدادنا، بتقول السوبرانو إنهم اختاروا أكتر آلة مصرية صميمة، وهي آلة (الهارب) المنقوشة بشكل كبير على جدران المعابد القديمة، وبدأت البروفات مع عازفة الهارب المصرية منى واصف، واتسجلت الأغنية بمساعدة مهندس الصوت القدير مفدي ثابت.
هنوصل للقاعة ازاي؟
الحفلة هتكون يوم 28 ديسمبر، وتقدر تشارك فيها من خلال الموبايل أو لاب توب أو حتى كمبيوتر، وفي تفاصيل أكتر علشان الحجز من هنا، أما بالنسبة للوصول لقصر نفرتيتي داخل مدينة ميتاتوت علشان تحضر الحفلة، فهيبقى من خلال بهو الشمس، أو من خلال قصر أخناتون.
وهتلاقي في القصر قاعات متعددة ومعارض لكل حاجة متعلقة بالمرأة والجمال، والأزياء المرتبطة بالحضارة المصرية القديمة، وعن طريقها تقدر تتنقل لقاعة المجد من خلال طريق الغموض، وده عبارة عن قاعة كبيرة اتوحدت فيها المعبودات، علشان ترسم من خلالها شعاع من الضوء على قناع نفرتيتي المحفور داخل جدارية بالقاعة وفوقه صورة نفرتيتي.
مدينة ميتاتوت فرصة للغوص في أعماق الحضارة المصرية بس بروح العصر الجديد، وبرؤية فنية متطورة للغتنا والحياة المصرية القديمة.