كل اللي محتاج تعرفه عن أول مدينة مصرية في الميتافيرس

مدينة الخيال اللي بتجمع بين الحضارة القديمة وبتقدمها في أحدث تكنولوجيا مستقبلية، تم رسميًا الإعلان عن أول مدينة مصرية في الميتافيرس في العالم الافتراضي، وكمان تم الكشف عن تفاصيل كتير فيها، واسمها “توتيرا”، إيه طبيعتها وليه الاسم ده؟

توتيرا

توتيرا يعني عصر توت، نسبة للملك المصري القديم توت عنخ آمون، والفكرة من اسم المدينة هو تخيلات بعودة توت إلى عصرنا الحديث لاستكمال حلمه في بناء مصر متطورة، خصوصًا إنه مات وعمره 18 سنة، وفي العالم الافتراضي، هنفترض عودته وتحقيق حلمه، تفتكر بكده تفاصيل المدينة هتكون ازاي؟

مش هتعيش في الماضي لكن هتبني المستقبل

من فكرة الاسم والمغزى اللي وراه، هتفتكر إن المدينة كلها أهرامات ومعابد ومظاهر من مصر القديمة وحضارتها، لكن لأ، علشان توتيرا في المستقبل، هتديلك فرصة تبني بنفسك مجسمات تعيش فيها، المدينة معمولة على النسق المصري القديم لكن هيتم تصميم مجسم للشخص اللي يدخل المدينة بشكل تفاعلي، علشان يعيش تجربته المميزة بنفسه.

ده غير إن كل قاعات المدينة الافتراضية تم تزيينها برموز مصرية قديمة لها دلالة، وبتضيف إلى التكوين المعماري الافتراضي.

المدينة أنشأها فريق عمل مصري 100%، والسكان أو الزائرين فيها هيعيشوا مجالات الحياة كلها، سواء السكن والترفيه والتجارة والتعليم وباقي الأعمال، مش بس مجالات الحياة العادية لكن كمان مجالات مستحدثة للعالم التخيلي، ده غير إن المدينة لها جانب مخصوص للتسلية والترفيه.

دستور توتيرا

علشان يبقى في قواعد بتنظم العيش في المدينة، لازم يكون في ما يشبه الدستور والقوانين، وده اللي حصل فعلًا بوضع ميثاق شرف لكل زوار المدينة، اللي تأسست على مبادئ وقيم بتهدف لحماية زوارها، وهي مستوحاة من قيم وأخلاقيات المصري القديم “مبادئ ماعت” وأهمها؛ لا قتل، لا سرقة، أو حزن، ويقدر أي حد من أي مكان في العالم يدخلها لكن يلتزم بالميثاق الخاص بها.

من الناحية الاقتصادية

في الجانب اقتصادي، تم تصميم أجزاء من المدينة يمكن تأجيرها للجامعات أو المؤسسات العلمية أو الشركات التجارية، وبكده هيكون متاح للجامعات مثلًا تأجير قاعة على الواقع الافتراضي لإلقاء محاضرة، يحضرها الناس من كل أنحاء العالم سواء بشكل مجاني أو بتذاكر.

وأي شركة تقدر تعرض منتجاتها في أحياء المدينة، فممكن شركة ملابس مثلًا تعرض منتجاتها في قاعة نفرتيتي، ويتاح للناس من كل أنحاء العالم دخول الحي ومشاهدة المنتج وشراؤه.

أما عن تصميم وتفاصيل المدينة من جوا، فهي بتتكون من قاعات كتير، أهمها طريق الملوك اللي بيعرض قصة أهم ملوك الحضارة المصرية القديمة، ده غير مراكز الأبحاث العلمية ومراكز بحوث علوم الفلك والفضاء ومناطق تعليمية مختلفة، وكمان قاعات للاحتفاليات والمهرجانات والاستعراضات.

آخر كلمة: ماتفوتوش قراءة: ميتافيرس: تطور تكنولوجي نسقفله ولا عزلة اجتماعية جديدة هنتجبر عليها؟

تعليقات
Loading...