أي عمل في الدنيا بيبقى نسبة حدوث خطأ فيه كبيرة وطبيعية كمان، لكن لما يحصل الخطأ ده في مجالات معينة منهم مجال الإعلام، بيبقى من الصعب إن الخطأ ده يمر مرور الكرام كده وبسهولة، لإن بيبقى ملايين من الناس شافوها، ووسط شعب معروف بطبيعته الساخرة زيّ الشعب المصري، فأي موقف ممكن يكون مصدر ضحك أو سخرية بيتم تداوله بشكل سريع وكبير، خصوصًا لما يكون الموضوع غريب. فانتشر اليومين اللي فاتوا مقطع من برنامج إخباري على القناة الأولى، كانت إحدى مذيعاته بتحط روج على الهوا، ومن بعدها شوفنا سيول من الميمز على الموضوع، ولكن شوفنا كمان دفاع من بعض الناس.
اللي حصل هو إن بعد افتتاحية نشرة التاسعة، قامت المذيعة أميمة تمام بوضع الروج لإنها افتكرت إنها مش باينة في الكادر وإن الكاميرات كانت موجها لزميلتها المذيعة أثناء حديثها، ولكن المخرج كان بيظهر لقطة واسعة ظهرت فيها المذيعتين، ومن سوء الفهم ده حصلت المشكلة. وبعد تداول انتقادات وسخرية من اللي حصل، وبرغم المصادر اللي أكدت إن أميمة من أكفأ المذيعات وإن اللي حصل ده كان خطأ مش مقصود، إلا إن الهيئة الوطنية للإعلام أعلنت إحالة المذيعة وفريق العمل كله للتحقيق لعدم مراعاة “المعايير المهنية” من خلال ارتكابهم الخطأ ده.
وردت المذيعة أميمة من خلال حسابها الشخصي على الفيسبوك، بتشكر فيه الناس اللي دافعوا عنها، وماعلقتش بطريقة مباشرة على الواقعة أو حتى مبررات حدوثها، فكتبت “إلى جميع الأيادي التي تمتد إليّ بالدعم والمحبة، هؤلاء الذين لم يبخلوا بكلمات طيبة عبروا من خلالها عن تقديره الشخصي ولتاريخي، مؤكدين أنه لم يذهب هباء، جراء التنمر والسطحية في زمن السوشيال ميديا”.