الموازنة في رمضان بين الصيام والعادات الرمضانية والمذاكرة بتكون في الغالب صعبة على الطلاب خصوصاً في ظل الشعور بالتعب والإرهاق وقت الصيام، والخمول والكسل بعد الفطار. ولحسن حظ الطلاب، رمضان السنة دي فيه أكتر من ميزة أولها إنه مش جاي في حر الصيف الشديد. وكمان مع ظروف فيروس الكورونا، التجمعات والعزومات قلت كتير وبقى في وقت فاضي أكتر للمذاكرة. وده بالإضافة إلى إن العبء الدراسي قل بشكل كبير على الطلاب مع تخفيف المناهج واستبدال الإمتحانات ببحوث في بعض السنين الدراسية.
إحنا جمعنالكم سبع نصايح علشان تساعدكوا في التوفيق بين متطلبات المذاكرة والصيام، والخروج من الشهر الكريم على أتم الاستعداد للإمتحانات.
لازم تصحوا بدري
الذهن بيكون في أنشط حالاته ومُستعد لتلقي المعلومات في الساعات الأولى من اليوم، وعلشان كده إنتوا محتاجين تناموا بدري وتصحوا للسحور قبل الفجر على طول علشان تبدأوا في المذاكرة من بعد الفجر لحد ساعات الصباح الأولى. وكمان من فوايد المذاكرة بدري، مش هتكونوا لحقتوا تحسوا بالعطش أو الجوع فهتكونوا في كامل الاستعداد للمذاكرة.
وبالنسبة لبعد الفطار، أفضل وقت للمذاكرة هو بعد الفطار بساعتين، وده لأن الفترة اللي بعده على طول بتكون فترة الهضم، وبيتم ضخ كميات كبيرة من الدم للأمعاء علشان يتم الهضم ومش هتقدروا تركزوا.
اعملوا جدول للمذاكرة
متضيعوش الوقت وحددوا أنتم محتاجين تعملوا إيه في يومكم. حطوا جدول مناسب بترتيب المواد على حسب أهميتها وصعوبتها، وحددوا وقت مناسب لكل مادة زي إنكم مثلاً تذاكروا المواد الأكثر صعوبة في الفترة اللي بعد الفجر والمواد اللي محتاجة تركيز أقل في الفترة اللي بعد الفطار.
وكمان اختيار المكان المناسب للمذاكرة ليه عامل كبير في التركيز فلازم يكون مكان هادي، والإضاءة فيه مناسبة، وبعيد كل البعد عن أماكن النوم.
متنسوش تلعبوا رياضة
للرياضة دور كبير في تصفية الذهن وتجديد النشاط فيه. ومع ظروف الصيام والجهد المبذول في المذاكرة، مش لازم نمارس تمارين صعبة، التمارين السهلة الخفيفة هتفي بالغرض. وخصوصاً تمارين التنفس وقت المذاكرة، وده لأنها بتعمل على تنشيط تدفق الدم في المخ، وبتعزز عملية التركيز، وبتفرز هرمون السعادة.
خلوا فطاركم دايماً صحي
مهم جداً إننا نتبع نظام غذائي صحي أثناء الصيام في رمضان، والسبب في ده هو إننا محتاجين عناصر غذائية مختلفة علشان نقدر نجدد نشاطنا. ولازم تتجنبوا الأكل الدسم لأنه بيزود من الخمول في الجسم، ومن أمثلة الأطعمة اللي ممكن تزود الجسم بالطاقة وقت المذاكرة المكسرات والفواكه.
انتم تقدروا كمان تعرفوا معلومات أكتر عن مكونات الفطار والسحور الصحي من هنا، وتلاقوا وصفات شوربة صحية من هنا.
اتجنبوا الفرجة على المسلسلات
إحنا كلنا عارفين إننا بمجرد ما بنبدأ الفرجة على المسلسلات مبنقدرش نبطل ومسلسل بيجيب مسلسل. وعلشان كده لازم تتجنبوها، وإلا هتلاقوا نفسكم مقدين كل الوقت بتحاولوا تعرفوا الروبوت يوسف الشريف هيعمل إيه، وهل خطة عصابة نيللي كريم الجديدة هتم ولا لا.
كده كده كل المسلسلات موجودة على النت، وهتقدروا تتفرجوا براحتكم على كل اللي إنتم عاوزينه بعد الإمتحانات فمتضيعوش وقتكم واستغلوه في المذاكرة.
تقبلوا حقيقة إنكوا مش هتكونوا في كامل قوتكم طول اليوم
الجسم بيفقد الطاقة اللي فيه بعد فترة من الصيام، ولازم تتقبلوا حقيقة إنكم مش هتقدروا تكونوا مركزين زي ما بتكونوا في أوقاتكم العادية، وعلشان كده لازم تاخدوا الموضوع بجدية وتنظموا وقتكم صح وبكده هتخلصوا رمضان وإنتم مستفيدين.
ولو حد بيعاني من الصداع في رمضان، يقدر يعرف أسبابه وإزاي يتغلب عليه من هنا.
اعرفوا إنكم قد التحدي وهتقدروا تذاكروا وتخلصوا كل اللي وراكم
خلاص إنتم قربتم تخلصوا فاضلكم كام بحث أو امتحان، وهتقدوا الصيف كله براحتكم من غير مذاكرة أو أي التزامات تانية. ركزوا على الحقيقة دي، وإحنا قربنا على نص رمضان لو مكنتوش لسه استثمرتوا وقتكم صح فيه، لسة قدامكم فرصة كبيرة متفوتهاش.