اللي قريته ده مش من أشباه “زهرة اللوتس” و”الزهرة المتفتحة” “وعصفور الربيع” والحاجات دي لا، هي أغرب من كده.. ده اسم مرض منتشر دلوقتي وله خطورة وبنشوف له أعداد إصابات ومخاوف، في البداية مانقدرش ننكر إننا ضحكنا في الأول واستغربنا، بس حبينا نعرف ليه الفيروس اسمه كده، وإيه خطورته ومنتشر فين.
“مرض قاتل يعود من جديد” دي أكتر جملة لقيناها في الأخبار عن المرض ده، الموضوع يخوف؟ مش عايزين ننشر الذعر برضه.. الموضوع ابتدى باكتشاف حالة إصابة من المرض النادر “بورنا” في ألمانيا، طب منين جه اسم “الحصان الحزين” ده اللي عاملنا قلق؟
الموضوع ياسيدي إن شكل الفيروس تحت الميكروسكوب عامل زي شكل الحصان المكشر كده، علشان كده ناس فسرت الاسم الغريب بالسبب ده، لكن في الأخبار الرسمية اتقال إنه اسمه الحصان الحزين القاتل لإنه تم اكتشافه في الأول من الخيول وتسبب في وفاة عدد كبير منهم.. وانتشر كمان بين الأغنام الماشية والقطط والكلاب.
المرض ده يُعتبر مرض نادر وتم اكتشافه كذا مرة في ألمانيا في القرن 17.. والمشكلة إنه بينتقل للإنسان، إيه أعراضه وخطورته؟
فيروسات بورنا BDV-1 و BDV-2 أعراضها
- مشاكل في الحركة
- آلام أسفل الظهر
- تغيرات سلوكية
- الارتباك
- آلام العضلات
- ارتفاع الحرارة
- تلف دائم في الدماغ والأعصاب
- تسمم الدم
وفي أعراض قاتلة.. أهمها التهاب الدماغ وتلف الدماغ، وده بيؤدي للوفاة في أغلب الحالات إن ماكانش كلها..
الدنيا أسودت؟ لا ماتقلقش.. رغم خطورة المرض وتأثيره القوي، لكن في لقاحات متوفرة بتقدر توفر حماية من الآثار السلبية للمرض، وبتقدر تحمي الدماغ بالتحديد من الآثار اللي بتكون خطيرة أكتر وبتؤدي للموت. لكن لحد دلوقتي مفيش لقاح محدد لمرض بورنا، بس كمان في عدد كبير من المصابين تعافى من المرض، لكن للأسف بيعانوا من أضرار طويلة الأمد، وبينتهي الأمر للمصابين بالمرض ده بالتهاب السحايا، وده عدوى بتصيب الأغشية الواقية اللي بتحيط بالمخ والحبل الشوكي.