فيديو انتشر على السوشيال ميديا في البرازيل، دفع النسويات والحقوقين هناك للتصعيد لمحاسبة المتهم، دكتور برازيلي مشهور اسمه فيكتور سورينتينو، في زيارته لمصر بغرض السياحة، قرر يصور بنت بتشتغل في مكان واستغل عدم فهمها للغة البرتغالية وتحرش بيها لفظيًا، بكلام وإيحاءات خارجة، وقعد يضحك هو وأصحابه في الفيديو لإن البنت كانت بتبتسم بلطف لإنه سائح وفاكراه بيشكرها أو بيجاملها لاستضافتها له، وده اللي زود غضب الناس اللي شافوا الفيديو على صفحته، اللي يعتبر بيجمع فيها بين الطب والـ blogging وباعتباره influencer، صفحته بيتابعها مليون شخص!
في جولته السياحية وفي زيارة أحد المتاحف، البنت في المكان اللي بتشتغل فيه كانت بتوريله ورق البردي وهو بيصور ستوري على انستجرام، استغل إنها مش فاهمة اللغة أوي وفضل يقولها إيحاءات جنسية، وبيسألها بعبارات جنسية قذرة والبنت مش فاهمة وبتهز راسها وبتبتسم على أساس إنها فاكرة إنه بيشكرها أو بيقول حاجة لطيفة، ومن وقتها، النسويات قالبين الدنيا على السوشيال ميديا علشان الموضوع يوصل للمصريين، والجريمة يتم التحقيق فيها ومعاقبة الجاني لإنهم طبعًا بيرفضوا فعل زيّ ده بمنتهى الشفافية.
الدكتور بعد الفضيحة دي، رجع علشان يحسن صورته قدام المجتمع، وبكل بجاحة، ادعى إنه كان بيهزر، وراح يصور تاني مع البنت ويقول لها إنه كان مجرد سوء تفاهم، من غير ما يوضحلها هو قال إيه ولا إنه قالها كلام جنسي هي مافهمتهوش، وهي برضه مافهمتش هو بيعتذر ليه، وبكل بساطة البنت وافقت بلطف إنه يصور معاها فيديو تاني، وللأسف، متابعين كتير عنده بمنتهى الاستخفاف ابتدوا يقولوا قد إيه هو إنسان واعتذر عن اللي عمله وقد إيه هو متواضع وإن الناس بتحقد عليه علشان هو مشهور.
وحاليًا بينتشر في مصر هاشتاج #حاسبوا_المتحرش_البرازيلي علشان يتم التحقيق في الواقعة ومحاسبة المتحرش، اللي لسه متواجد في مصر لحد دلوقتي في جولته السياحية، وموجود في الأقصر، بنتمنى النيابة العامة تتخذ قرار سريع في الواقعة لعدم التهاون في حق بنات مصر.