لو أنتي محجبة، مش سهل تلاقي لبس على الموضة ويناسب الحجاب من غير ما تكوني مضطرة تلبسي أكتر من قطعة على بعض أو متلاقيش ستايل هدوم حلو وجديد ينفع تلبسيه بالحجاب، ومعظم المحجبات بيدوروا على لبس بخامة كويسة ومش شفاف ومش مفتوح، ودي بتكون معادلة صعبة إنك تلاقي كل المواصفات دي وتكون كمان على الموضة، علشان كده هنقولك النهارده على أماكن و براندات في مصر بتوفر لك هدوم بالمواصفات اللي بتدوري عليها ومناسبة للحجاب.
فابريك تيلز
بأكتر من ستايل، فابريك تيلز بيعملك قطع مميزة بألوان كتير غير المعتادة، لكن لو بتحبي تبقي في منطقة الأمان وبتختاري الألوان التقليدية برضه هتلاقيها هناك. الخامات اللي بيصنعوها مش هتكون متعبة ليكي في تنسيقها ومش هتحتاجي قطع كتير مكملات لها، فهتعملي طقم بسهولة.
برود ستايل
بيعملوا ستايلات كتير تناسب جميع الأوقات والمناسبات (شغل-جامعة-خروج-زيارات-سواريه للمناسبات) من فساتين وتيشيرتات سادة أو مطبوعة، وكمان أشكال مختلفة من Kimono وكمان الجيبات.
تقدري تتابعي صفحتهم على إنستجرام من هنا، وكمان تقدري تتابعي صفحتهم على فيسبوك من وتعرفي أماكن فروعهم وازاي تطلبي أونلاين.
حجاب بوتيك
بيقدموا أنواع مختلفة للبس الكاجوال اللي هتحتاجيه كل يوم، بقطع متنوعة من بلوزات وجيبات بأشكال مختلفة سواء مطبوعة أو بقصات مختلفة، بالإضافة للفساتين والطرح.
وتقدري تتابعيهم علشان تعرفي تفاصيل أكتر عن كل كوليكشن وازاي تقدري تشتري.
كوكياج
هتلاقي فيه ستايلات كتير متنوعة لكل المناسبات، بخامات مختلفة مريحة وأشكال كتير تقدري تختاري اللي يناسبك، وصفحتهم على فيسبوك هتعرفك ازاي تقدري تشتري منهم. المميز عندهم لبس الصيف اللي بيعملوه بألوان صيفية فاتحة ولذيذة، ومش هتحتاجي تنسقي عليها قطع كتير في الصيف.
أخوات
متوفر عندهم أشكال وأنواع كتير للبس مناسب للمحجبات في مناسبات مختلفة، وكمان بيساعدوكي تعملي (styling) للهدوم على صفحتهم على إنستجرام، يعني مش هتحتاري وأنتي بتنسقي القطع وهيدولك أفكار مختلفة تقدري تلبسي بها القطعة بالشكل اللي يناسبك.
ريحانة
باستايلات مختلفة أغلبها من الفساتين اللي على أحدث موضة، بيقدم البراند أنواع مختلفة من اللبس اللي بيناسب المحجبات في مناسبات كتير، أيًا كان مشوارك هتلاقي حاجة تناسبه، وده المميز عندهم لإن الفساتين اختياراتها مش بتكون كتير في الماركات، وصعب المحجبات ينسقوها بشكل مناسب، وكمان لإن الفساتين هي القطعة المفضلة عند البنات وبيحبوا يلبسوها كتير.
أجمل
هنا هتلاقي حاجات كتير كاجوال لكن بستايل واسع وطويل، والمميز في البراند ده إنهم بيعملوا فساتين أفراح وفساتين سواريه للمحجبات، مش هتحتاجي تفكري تقفلي الفستان بقطع زيادة ويا ترى هتبقى لايقة ولا هتخلي شكله وحش ومش هتليق، هتلاقي عندهم اختيارات كتير لفساتين تنفع لمناسبات مختلفة.
اختيارات كتير ممكن يساعدك فيها فيديوهات لتنسيق اللبس، وده سهل جدًا بوجود بلوجرز خصوصًا على انستجرام بيقدموا المحتوى ده علشان يسهلوا على البنات وعلشان كلنا نلبس بشكل حلو ومريح في نفس الوقت، وحتى البراندات نفسها بقت بتعمل فيديوهات لتنسيق اللبس.