في قاموس الحبيبة أنواع مختلفة من الحب؛ الحب اللي بيملى الدنيا حواليه فراشات وقلوب، وتحس إن الحبيبة ملايكة طايرين بجناحات وتخاف تزعلهم أو تكسر قلبهم، ودايمًا الدنيا والظروف هي اللي جاية عليهم، أو بمعنى تاني “الحبيبة الغلابة”.
وفي حبيبة من نوع تاني، حبيبة مش سالكين، محركهم الأساسي هو الشر والخطط والمؤامرات، ومن كتر ما هما شبه بعض القدر حطهم على نفس الطريق، واتجمعوا إما بأذية اللي يقف في طريقهم، أو أذية من باب الأذية لإن تركيبتهم كده.
وفي المقال ده، جبنالكم ثنائيات جمعهم قصة حب، لكن كانت متغلفة بغلاف الشر، وكانت قاسم مشترك سواء بالسرقة أو القتل أو الأعمال غير المشروعة في السينما والدراما.
عبد العال وسكينة – ريا وسكينة
وهي المهلبية تستغنى عن الزبيب؟ قصة حب جمعت ما بين أشهر سفاحين وصل شهرتهم في العالم كله، وهنا مش هنتكلم عن القصة الحقيقية اللي مكتوبة في الكتب واللي روتها الأساطير، هنتكلم على اللي شوفناه على الشاشة من وجهة نظر سينمائية. اللقاء الأول بينهم لما كان جاي وسطة خير علشان يرجعها لصاحبه ولكن هيعجب بها هو ويفكس لصاحبه، وهيتصاحبوا هما على بعض، وهيتخلق بينهم قصة حب كبيرة، عبد العال مش هيقدر يستغى فيها عن سكينة لدرجة إنه لما يعرف بأعمالها الإجرامية حبه هيخليه مايقدرش يبعد عنها، وهيبقى شريك وضلع أساسي في عمليات قتل وخنق الستات، هيحصل بينهم مشاكل كتير ولكن في كل مرة هيرجعوا لبعض، وزي ما كانوا طول حياتهم مع بعض نهايتهم في الآخر هتبقى واحدة ومع بعض.
صباح وشوقي – الحاج متولي
شوفناهم ثنائي شرير وفي نفس الوقت دمه خفيف، صباح (عايدة رياض) كانت حاطة عينها في البداية على الحاج متولي قبل ما يبقى حاج فعلًا وتاجر كبير، وشوقي (مجدي عبد الوهاب) كان حاطط عينه عليها من أول ما شافها بتخدم في بيت الحاج سلامة اللي كان بيشتغل عنده هو ومتولي في محل القماش، ولكن كل شيء هتيتغير وهنشوف على مدار الحلقات حب شوقي الملزق اللي هيكبر لصباح يوم بعد يوم، وهنلاقي إن صباح مش هتلاقي غير شوقي علشان تحبه بعد ما يفكسلها متولي ويتجوز غيرها، وهتتجوز شوقي ومن هنا هيكونوا مع بعض ثنائي شرير رومانسي جميل هيتجوزوا وهيشتغلوا في الأعمال والسحر والخزعبلات والضحك على الدقون، وهيحاولوا ينتقموا من متولي بكل الطرق طول المسلسل، صباح علشان خلي بها وشوقي علشان كان غيران منه إنه كان يخطف منه حب عمره صباح.
مهجة ووجدي – غرام الأفاعي
مهجة ووجدي طلبة في كلية الصيدلة، حبوا بعض من أيام الجامعة، وكعادة القصص الرومانسية الظروف فرقت بينهم، لإن وجدي كان على قد حاله ومهجة بنت أكابر، وزي أي عيلة أصيلة هيجوزا بنتهم لصاحب الجاه والمال غصب عنها، وبمجرد زواجهم هتبدأ مهجة في تنفيذ خطتها علشان تتخلص منه.
هتقنعه يفتح لها صيدلة وتجيب فيها حبيب العمر، وهيتفقوا هما الاتنين علشان يسمموه بسم معتبر، تأثيره مش بيظهر غير بعد أيام والموضوع مستحيل يتكشف في التحاليل والأشعة “موتة قضاء وقدر”، وجدي هو اللي عمل السم وجربوه على الفئران لما كان في الكلية، يعني جريمة مكتملة الأركان مافهاش أي شبهة جنائية.
وبعد ما يموت الراجل ويتجوز مهجة ووجدي الحكاية مش هتخلص على كده، وجدي عينه هتبدأ تزوغ على بنت تانية، وطبعًا مهجة علشان بتحبه وبتغير عليه بشكل جنوني مش هتقبل ده، وهتصبح الحياة بينهم مستحيلة، فهتقرر تحط له من نفس السم اللي حطته هي وهو لجوزها، ولكن المفاجأة هنا إن وجدي كمان هيكون حاططلها هو كمان السم في نفس الوقت، وبعد ما يفوقوا للي عملوه في بعض في لحظة غضب وازاي ضيعوا حب حياتهم، هيكون خلاص السم اتمكن منهم وهيموتوا هما الاتنين في حضن بعض على سرير العناية المركزة.. شوفتوا كارما أكتر من كده؟
إبراهيم وانشراح – السقوط في بئر سبع
إبراهيم وانشراح قصة حب جاسوسية من العيار التقيل، واللي مايعرفش إن المسلسل مبني على قصة حقيقية، انشراح اللي أدت دورها إسعاد يونس، خلصت شهادتها الإعدادية وفي فرح من أفراح العيلة قابلت إبراهيم (سعيد صالح) وزي ما بيقولوا حب من أول نظرة وقع في حبها وبعد أيام قليلة اتجوزوا.
إبراهيم كان معروف عنه قلة الزمة، وكان معروف إنه بياخد رشاوي كتير، ومن هنا هتبدأ القصة، لما إسرائيل هتفكر في تجنيده علشان يشتغل جاسوس معاهم وبالفعل اشتغل وكان مسؤول عن إرسال الأخبار من مصر لتل أبيب، ولما قرر يتوسع في النشاط والخيانة مالقاش غير زوجته وحب عمره علشان تساعده في التجسس، وكان لها دور كبير وبقت رفيقة دربه، وشغلت ولادها كمان، وبعد ما ينكشف أمرهم النهاية طبعًا معروفة، اتعدم إبراهيم، ولكن انشراح اتسلمت لإسرائيل مقابل تسليم جنود أسرى.
كيداهم وحنفي – كيد النسا
كيداهم (فيفي عبده) وحنفي (أحمد بدير) أو حنفنف زي ما كانت بتدلعه كيداهم، قصة حب فيها الطابع الكوميدي، ومع الكوميديا كان المحرك الأساسي هو الشر، لإنهم كانوا تجار مخدرات وسموم، كانوا بيعملوا مؤامرات وخطط لأي حد يقف في طريقهم، واللي أحيانًا ممكن توصل للقتل.
وبرغم الشر ده، كان قلبهم هما الاتنين مليان قلوب وفراشات، واللي مقوي صلتهم أكتر إن بناتهم التلاتة كانوا مستعدين يعملوا أي حاجة علشانهم.
حمادة وتوتو – عصابة حمادة وتوتو
توتو (لبلبة) وحماد (عادل إمام) اتنين متجوزين عن قصة حب كبيرة، ولكن الظروف هتدفعهم لتكوين عصابة بتسرق وتنهب بعد ما اتطرد حمادة من شغله واتسرق مشروعه، فمش هيبقى قدامهم غير السرقة والنط على البيوت والنصب علشان يدفعوا إيجار البيت ويصرفوا على ابنهم الوحيد، لحد ما يبقوا من كبار رجال الأعمال في البلد، وكل ما يكبروا مستوى محاولات السرقة كانت بتكبر والحيل بتكبر.
وكل ده كانوا بيعملوه مع بعض من باب روح المشاركة والحب الكبير اللي ما بينهم، وماشيين على مبدأ يا نعيش عيشة فل يا نموت احنا الكل.