لأسباب كتير معظمها مش عارفينها، فصل الشتا بالذات بيبقى فصل الحنين للماضي والحنين للأخطاء، تحس إن عقلك بيقرصك تعمل أي غلطة ونندم عليها بعدين مش مشكلة، ده غير الحنين غير المبرر اللي وصفته الفنانة فيروز لما قالت “عندي حنين ما بعرف لمين” وطبعًا ده بيزيد بمعدلات قياسية في الشتا، طب لو العبد لله سنجل.. نواجه المشاعر دي كلها ازاي بأقل قدر ممكن من الخساير؟ هنحاول نفكر مع بعض في حلول علشان مانعملش غلطات نندم عليها سنين، ممكن نعمل غلطات أصغر شوية ونندملنا شهرين تلاتة مش حوار زي ما الميم الشهير بيقول.
مبدئيًا اعمل بلوك للإكس
في حالة إنك كنت في علاقة مؤذية ومخلصينها في المحاكم، أو على رأي أحمد حلمي وريهام عبد الغفور “ضاربين بعض بالجزم” يبقى بننصحك في الحالة دي إنك تنسى خالص أوبشن الرجوع للإكس، ابعد عنه خالص وكفاية أذى في نفسك، مش الحل لفراغك العاطفي إنك ترجع لعلاقة خرجت منها واتأذيت فيها.
سواء بترتاح في فكرة إنك تعمل بلوك، أو شايف إنها شغل عيال وبتحل أمورك بإنك تمنع نفسك من الكلام مع الشخص من غير بلوك ولا حاجة، اعمل الحل اللي أنت شايفه يخليك تبعد عن العلاقة القديمة دي بأي طريقة.
قوّي علاقاتك مع أصحابك وأخواتك
دول اللي هنلجأ لهم في المواقف اللي زي دي، علشان صحابك هما اللي هيكونوا سندك في الفترة دي ووقت ما تحب تصيح وتشارك كلام ورغي مش هتلاقي غيرهم يسمعوك، وكمان حاولوا تعملوا أي أنشطة مع بعض تغنيكم عن الحوجة للعلاقات العاطفية، اخرجوا أنتم واتفسحوا وجربوا أماكن جديدة مع بعض كـ شلة جميلة، روحوا حفلة، ازرعوا شجرة، احصدوا زرعة، اعملوا أي حاجة.
شوف مسلسلات وأفلام تعوض الفراغ العاطفي
وطبعًا أول نصيحة في النقطة دي إنك تبعد عن الأفلام الرومانسية والمسلسلات اللي هتزود عليك إحساس الحنين، خليك في أفلام الأكشن والمغامرات والحركات، شوف كوميدي يفك عنك أنت ونفسيتك، افتكر إننا قولنا لك بلاش رومانسي.
بنرجح لك اقتراح كمان، عارف الليستة المفضلة ليك اللي دلوقتي بيسموها (comfort show) اللي مهما شوفتها بتحب تشوفها تاني عادي وحبها في قلبك مش بيقل؟ اترمي في حضن الليستة دي بقى.
استسلم وارتبط عادي
مش عارفين المفروض نكون بنقول كده ولا لأ، بس هنقول بقى ورزقنا ورزقك على الله. لو لقيت حد مناسب اتكل على الله وارتبط وقضي الشتا في علاقة رومانسية وكل حاجة، وسيبك من المقاومة والطرق اللي بندور بها ازاي نواجه الشتا واحنا سناجل، ارتبط عادي لو قدامك فرصة مش هنمنعك.
بس خلّي بالك علشان ماتبقاش بتعيد غلطات الماضي، ركز في اختيارك علشان ماتبقاش ذكرى مؤلمة في الشتا اللي جاي وتكره نفسك وتكره الشتا وتكرهنا في عيشتنا معاك.
لو الإكس في منه أمل ارجع له بمبدأ اللي نعرفه أحسن من اللي مانعرفوش
جايين لك ورقبتنا قد السمسمة برضه في الحل ده، لو الموضوع ماكانش مأساوي في علاقتك بالإكس ارجع له وأهو أحسن من الغريب، بدل ما نقعد نجرب مع حد جديد ونبتدي مرحلة بتحب ألوان إيه وعندك أخوات ولا لأ، ارجع للي عارفك وخلاص وحاولوا تصلحوا علاقتكم وتصلحوا الحاجات اللي كانت السبب في إنكم انفصلتوا المرة اللي فاتت، واشتغلوا على علاقتكم دي علشان الظاهر كده إن مالكوش غير بعض.
حاولنا ندور على حلول تخلينا نواجه كلنا فرط الحنين وماسورة المشاعر اللي بتضرب في وشنا فجأة في الشتا، بس لو عندك حلول تانية شاركنا بها، لو هتعمل بالحلول اللي قلناها خلّي بالك برضه علشان هنبيعك ونخلي مسؤوليتنا.