بتشتغل أبو ظبي النهارده على مشروع ضخم لبناء أول مدينة مستدامة في شبه الجزيرة العربية، موقع المدينة على جزيرة ياس Yas في الإمارة، المشروع اللي هيبدأ الشغل فيه خلال الربع التاني من السنة الحالية 2023، من المتوقع إنه ينتهي في سنة 2025.
المدينة الخضراء هتتكون من حزام أخضر بطول مساحتها، وهيكون فيها حدايق وبحيرات، وصوبات زراعية بغرض إنتاج الخضراوات وتحقيق اكتفاء ذاتي داخل المجتمع.
المدينة الجديدة على جزيرة ياس Yas هيكون فيها مرافق عامة مختلفة؛ منها مركز للفروسية واسطبلات للخيول ومضمار للسباق وحلبات للألعاب الرياضية وجيم، غير حمامات السباحة والطرق المخصصة لركوب العجل والجري ولعب كرة القدم وكرة السلة وحاجات تانية كتير.
علشان يكون مجتمع متكامل، هتضم المدينة الجديدة محلات لبيع كل المنتجات ومطاعم وحضانات، ومركز لرعاية الأطفال اللي على طيف التوحد، ومسجد أخضر بيحقق مفهوم الاستدامة.
المشروع المصمم علشان يدعم الجو الأسري بيتبني بتعاون مشترك بين شركة الدار العقارية مع شركة دايموند ديفلوبرز، وبيعتمد في التصميم على أهم مميزات مدينة دبي اللي بتخليها مثال للمدينة المستدامة، وهتحقق مفهوم مدينة المُشاة، بتوفير مساحات للمشي على طول مساحات خضراء مفتوحة وأرصفة مشاة وقطع للزراعة للتمليك الشخصي.
كمان حرص المصممين في المدينة الجديدة على تحقيق مبدأ مهم جدًا للحفاظ على الطبيعة، وهو مبدأ الانبعاثات المنخفضة للغازات الدفيئة، وده من خلال استخدام شبكة كبيرة من العجل والعربيات اللي بتشتغل بالكهرباء، وده هيوفر للسكان الفرصة إنهم يتحركوا داخل المشروع في الوقت اللي عربياتهم مركونة على أطراف المدينة، وبيركز المشروع على تحقيق الرؤية دي بسلاسة، وزيادة إمكانية الوصول لكل مستويات المدينة من غير عربيات شخصية.
تصميم المدينة المستدامة هيوفر مساحات للسكن في مجمعات سكنية كبيرة بكذا مستوى (Town houses) بتجمعات سكنية بتصميمات جديدة ومختلفة.
مدينة مستدامة وسكان أكثر وعيًا بقضايا البيئة
بيقول جوناثان إيمري، الرئيس التنفيذي لشركة الدار للتطوير: “تعتبر المدينة المستدامة مشروع مهم من مشاريع شركة الدار”. وبيضيف: “المجتمع الجديد هو استجابة للطلب المتزايد اللي لاحظناه على أسلوب حياة أكثر استدامة، مع ظهور مجموعة من العملاء عندهم وعي بقضايا البيئة، واللي بيدوروا على تجربة أسلوب حياة طبيعية، وبيحاولوا يقللوا انبغاثات الكربون ويحافظوا على الطاقة، وعندهم وعي بخصوص المبادئ الأساسية للاقتصاد الدائري”.
أهداف المدينة الجديدة هي إنها تحقق مفهوم الاستدامة البيئية، من خلال تكوين مجتمع بيستند لتلات أساسات مهمة مشتقة من المفهوم ده، وهي الاستدامة الاجتماعية والبيئية والاقتصادية.
المشروع اللي هيكون واحد من مجموعة مشاريع مستدامة في أبو ظبي، هيشتغل بالطاقة النظيفة والمتجددة، وهتتوفر ألواح شمسية في كل المباني ومواقف العربيات، وده هيوفر حوالي 50 في المية من فواتير الطاقة، وهيساعد في تحقيق مفهوم الاستدامة البيئية والاقتصادية في نفس الوقت.
كمان هيتم إدماج نظم المياه عالية التكنولوجيا، واللي هتحقق كفاءة أكبر بتتوافق مع مبادئ الحفاظ على الطبيعة ومبادئ تصميم المجتمع المستدام، بالإضافة لكده هيكون في هيئات مختصة بعملية التدوير اللي هتقلل من انبعاثات الكربون واستهلاك المياه واستخدام الطاقة والنفايات.
قال صلاح حبيب، الرئيس التنفيذي لشركة (Diamond Developers): “المجتمع هيستخدم أحدث الابتكارات في مجال التكنولوجيا المستدامة، وده اللي هيخلي أبو ظبي في الصف الأول من صفوف المعركة ضد تغير المناخ”.