الفن المصري، ومن بدايات التاريخ، كان واحد من أهم وأبدع أشكال الفن العالمي، ولإن النحت كان له دور مهم في البروباغندا السياسية والعقيدة الدينية، ظهر كواحد من أهم عناصر التعبير الفني عند المصري القديم.
وكان لمدرسة النحت في مصر القديمة أسلوب شديد التميز خلاها نوع فني متفرد عن مدارس النحت العالمية، فاختلفت يد الفنان المصري -مثلًا- عن يد الفنان اليوناني، من حيث طريقة التعامل مع الحجر والأغراض الفنية والعملية وتأثير ده على المنتج النهائي.
رغم القدرات الفنية والعملية الجبارة اللي لسه آثار المصري القديم بتشهد بها لحد النهارده، إلا إن مصر ماعرفتش نحاتين من أبناء الوطن لمئات السنين ولحد وقت قريب في تاريخها المعاصر.
لمئات السنين، فضل فن النحت المصري أسير واقع مشؤوم، ولحد يوم ميلاد أول نحات مصري في العصر الحديث، وواحد من أهم فنانين العالم، إنه حفيد الفراعنة ورائد النحت المصري المعاصر، وخالق تمثال “نهضة مصر”، وباعث الحياة في فن النحت المصري، البديع “محمود مختار”.
بيقولنا ماهر حسن في كتابه (الفنان: محمود مختار)، إنه اتولد فى 10 مايو من سنة1891، في قرية (نشا) القريبة من المنصورة، وفي طفولته كان مختار مولع باللعب في الطين على شاطئ النهر والترع، وكان بيعمل تماثيل من الطين لمشاهد القرية من أشخاص وحيوانات وجمادات.
بيقول حسن: “كان يعود من رحلته اليومية حاملًا تماثيله الطينية ليضعها في فرن المنزل فتجففها الحرارة، ويأخذها إلى سطوح البيت ويلعب بها مع إخوته، ويؤلف لها الحكايات، ويجعلهـا تتحدث مع بعضها في حوار بصوته”.
التحق بمدرسة الفنون الجميلة سنة 1908، وبعدها سافر لباريس سنة 1911، والتحق بمدرسة (البوزار) للفنون الجميلة، ودرس الفن على إيد “كوتان” ودرس بعدها على إيد النحات الفرنسي “أنطونان مرسييه”، وفي بداية حياته كان أسلوبه في النحت يعتمد المدرسة الغربية الواقعية في ترك فراغات داخل جسم التمثال.
بيقول حسن: “في امتحان القبول بمدرسة الفنون الجميلة في باريس (بوزار دي باري) تقدم أكثر من مائة طالب، ففاز مختار عليهم جميعًا، وكان هذا الفوز حدثًا في المدرسة، ظل الطلبة يذكرونه ويعجبون لـ “رمسيس الجديد” -كما كانوا يلقبونه- الذي تجاوز مجموعة تمثل شباب أغلب بلدان العالم”.
بعد كده اتجه مختار للمدرسة المصرية القديمة، اللي اعتمدت على خلق التمثال من كتلة حجرية مصمتة من غير فراغات، وده اللي ظهر في مجمل أعماله الفنية التالية؛ زي تمثال مناجاة، ونحو الحبيب، وكاتمة الأسرار، وغيرهم من التماثيل اللي جسدت روح القرية المصرية.
اشتغل على تمثال نهضة مصر علشان يصور رؤية مصر الحديثة، ونظم اكتتاب شعبي لإقامة التمثال ساهمت فيه الحكومة، وكل طوائف الشعب، حتى المتسولين كانوا بيتبرعوا لصندوق إنشاء التمثال.
انتهى من تمثال نهضة مصر عام 1928م، وتمت إقامته في ميدان باب الحديد (رمسيس حاليًا)، وهو النهارده حاضر في ميدان جامعة القاهرة، بعد نقله سنة 1955.
يقول حسن: “وسارع أفراد الشعب، أغنياؤه وفقراؤه، للاكتتاب، وتحول تنفيذ هذا التمثال وإقامته إلى مهمة مقدسة، وصار مختار بطلًا وطنيًا مكلفًا بمهمة وطنية كبرى، وهي المهمة التي تُكللت بالنجاح في عام 1928”.
اتبرعت أسرة محمود مختار بأعماله للدولة بشرط إقامة متحف لها، وبالفعل أُقيم المتحف سنة 1962، في منطقة الزمالك وسط حدائق الجزيرة، وداخل حديقة الحرية، وفي مواجهة دار الأوبرا المصرية.
يحتوي المتحف على 175 عمل من أعمال مختار، اللي نفذها بخامات مختلفة، بالإضافة لأدواته الخاصة اللي كان بيشتغل بها في النحت، ووثائق وصور نادرة لمختار، وأهم الجوائز والأوسمة العالمية اللي حصل عليها.
وفي المتحف، هتلاقي قبر الفنان محمود مختار، وتقدر تزوره وتسيب ورد، بعد ما تخلص زيارة المتحف وتشوف أعماله الجميلة اللي بتمثل الروح المصرية.