مصطلح غريب شوية؟ هو المصطلح الأساسي كمان “فنادق خضراء”، بس معناه ببساطة ومن غير تعقيد إن الفنادق دي بتمثل اتجاه حديث في السياحة البيئية، وهدفها تقليل الأثر السلبي على البيئة من خلال ترشيد استهلاك الطاقة التقليدية في الفندق، واستبدالها بطاقة نظيفة، ده غير الالتزام بالتعليمات والمقاييس اللي بتتعلق بالتصميم الخارجي والداخلي للفندق، والطرق اللي بيتم بيها معالجة المخلفات بأنواعها، وكل ده بهدف المحافظة على الموارد الطبيعية وتقليل التأثيرات السلبية للصناعة الفندقية على البيئة، وكمان توفير الأجواء الصحية للنزلاء في الفنادق.
لو حابب تعيش التجربة دي، هنقول لك على فنادق في أماكن مختلفة في الشرق الأوسط.
تازيري إيكولودج – سيوة
في مصر، بطبيعة سيوة المختلفة، اتبنى منتجع سياحي بمواد طبيعية متوافقة مع تقاليد سيوة، وبيطل على الجبل الأبيض وبحيرة غاري وبساتين النخيل وبحر الرمال العظيم. أما عن تصميمه، الغرف واسعة وبتحتوي على حمامات خاصة حديثة. كل الغرف فيها شباك خاص، وموجود فيها شبابيك صغيرة بتقدر تلقط الرياح وبتقلل من الحاجة للتكييف. وفي الإضاءة، بيتم استخدام مصابيح الزيت والشموع.
وعن موقعه، موجود على بعد 16 كم من مركز المدينة، وعلى بعد 4 كم من معبد أوراكل. ولو عايز تعرف تفاصيل أكتر، ممكن تتصل بالرقم ده: 01016333201
بارك حياة – أبو ظبي
فندق وفيلات في جزيرة السعديات في أبو ظبي في الإمارات، والجزيرة دي موطن طبيعي لنباتات الكثبان الساحلية. وتم حماية النظام البيئي الحساس المليان بالثروة النباتية والحيوانية المحلية في المنطقة دي من خلال إنشاء منطقة حماية الكثبان الرملية في السعديات، لكن بتقدر توصل للشاطئ من خلال ممرات خشبية مصممة مخصوص. والمنطقة تُعتبر محمية طبيعية وموطن للغزلان والطيور والزواحف والثدييات الصغيرة. طبيعة بتتميز بكل ده أكيد الفندق فيها هيكون صديق للبيئة، وفندق “بارك حياة” فيه منطقة جلوس واسعة وفيها شاشة تلفزيون، وبتضم نوافذ ممتدة من الأرض للسقف وتم تزيينها بألوان ناعمة.
الفندق على بعد 35 دقيقة بالعربية من مطار أبو ظبي الدولي، والفندق كمان بيوفر مواقف مجانية للسيارات في الموقع.
موفنبيك البحر الميت – الأردن
منتجع في الأردن، بيتم فيه استخدام السيارات الكهربائية المشحونة بالطاقة الشمسية، وتم تطوير خطة لمعالجة مياه الصرف الصحي لاستخدامها في الري والتنظيف الخارجي. ومهتمين بالحرص على التقليل من استهلاك الطاقة في كل خدمات الفندق. المنتجع كمان بيتبع سياسات وممارسات بيئية خاصة من خلال استخدام الأحجار المحلية والنباتات الأصلية علشان يخلق مساحة متناغمة من الناحية الجمالية والبيئية.
الفندق مشهور بحديقته اللي مساحتها 20 فدان، وشاطئه الخاص، وسبا زارا، وبكده ممكن تستفيد من العلاجات الخاصة في البحر الميت.
أليلا الجبل الأخضر – عُمان
من أعلى قمة في عمان، فندق أليلا الجبل الأخضر تجربته مختلفة بمنظر بيطل على جبال وعرة ووديان، وبيوفر ليك العيشة في مكان طبيعي بعيد عن الحياة العصرية. المنتجع تم تصميمه بشكل ينسجم مع الطبيعة حواليه، والبناء بتاعه مستوحى من الحصون التاريخية في عمان، وبيمزج بين تقنيات البناء التقليدية والعمارة المعاصرة، وبيعكس فن التصاميم العمانية الأصيلة زيّ الزخارف النحاسية والفخار المصنوع يدويًا.
الفندق بيستخدم أسس الاستدامة وبيشجع الضيوف على تجربة الحياة المحلية وتقاليدها، وبيدعم نشاطات زيّ جولات المشي الطبيعية وركوب الدراجات في الجبال ورحلات ثقافية ودروس طبخ كمان.
منتجع المها – دبي
على بعد 45 دقيقة بس من دبي، في قلب محمية دبي الصحراوية، منتجع المها بيتميز بالرفاهية وبيحرص على الأسلوب المستدام الموجود في كل حاجة في طبيعة المكان، زيّ تصميم الخيم المستوحاة من الثقافة العربية والتراث البدوي. وموجود في قلب الطبيعة الصحراوية اللي بتديلك حرية اكتشاف الحياة البرية في الصحراء، كجزء من الأنشطة اللي بتهتم بحماية البيئة جوا المنتجع.
ده غير إن الأنشطة في المنتجع والخدمات اللي بتتقدم صديقة للبيئة، فمثلًا عربيات الجولف بتستخدم بطاريات بدل الوقود لحماية البيئة، ده غير إن استخدام المياه والطاقة بيتماشى مع أهداف الاستدامة، وكمان إعادة تدوير زيوت الطبخ علشان تبقى وقود للطاقة.
في أي فندق منهم، هنعيش تجربة مختلفة في السفر والاستجمام ماجربتهاش قبل كده في أي مكان. وأنت حاسس إنك قريب من الطبيعة بشكل غير اللي متعود عليه.