على مدار سنين كتير، بين الماضي والمستقبل، بتختلف وتتطور وسائل التواصل بين البشر، وخبر إزالة أخر تليفون عمومي (payphone) في نيويورك خلانا نفتكر كل وسائل الاتصال اللي أتعودنا نشوفها على مدار أزمنة مختلفة، باختلاف الأماكن كمان؛ في مصر مثلًا خبر إزالة أخر كابينة ميناتل كان خبر حزين لينا ولذكرياتنا، لكن ده بيخلينا نفكر في الوسائل دي وتطورها، من أول التليفون اللي بقرص لحد الاختراعات اللي بنسمع عنها ونشوفها وبنتوقع تكون موجودة خلال السنين الجاية، واللي ممكن توصل لإننا نكلم بعض بالهولوجرام؛ يعني صاحبك يبقى كإنه واقف جنبك كده حتى لو هو في آخر الدنيا.
وجود التليفون
جراهام بل هو اللي اخترع أول تليفون، زيّ ما احنا عارفين من صغرنا، واخترعه علشان يساعد الصم. وأتقلب الاختراع بعدها لأحسن فكرة بتخدم التواصل بين الناس وبتتطور لحد دلوقتي؛ من فكرة إنك علشان تتصل بحد، بتتصل الأول بسنترال أو مركز مخصص إنه يوصل المكالمات والأرقام ببعض، فتتصل تقوله أطلبلي الرقم ده، وتستنى بقى المكالمة بعدها، خلال ساعة ساعتين، لحد ما ربنا يسهل بقى.. لحد ما أتطورنا شوية سنة 1919 للتليفون اللي مش بيحتاج العمليات المعقدة دي كلها، وتقدر تتصل بشكل مباشر بالشخص اللي أنت عايزه.
التليفون بقرص
وفي 1928 تم اختراع التليفون اللي ممكن تشيله كامل بإيد واحدة، بمعنى إن المايك والسماعة في نفس الدراع. وسنة 1937 تم تطوير التليفون وتم تزويده بقرص بيعمل صوت الجرس لما تستقبل مكالمة.
التليفون بزراير
وفي 1973 اخترعوا التليفون اللي بزراير أخيرًا، وفي نفس السنة، العالم الأمريكي اخترع التليفونات اللي بتشتغل عن بعد من غير أسلاك بينها، وفكرته كانت إن بيتم إرسال الموجات الكهربائية عبر الهواء عن طريق أجهزة الميكرويف المتثبتة في مساحات معينة، ومن وقتها أتطورت التليفونات بشكل كبير.
التليفون المحمول
مش عايزين نقول “موبايل” لأ، حابين نوصل فكرة “تليفون محمول” دي بمعنى الكلمة كإنجاز.. أنت شايل تليفون في إيدك بتاخده أي مكان معاك، دي في حد ذاتها معجزة بعد ما كانت العملية معقدة والتليفون ماتقدرش تشيله بإيدك أصلًا، ده غير تعقيدات التوصيلات والأسلاك، وإن المايك في حتة والسماعة في حتة تانية، ودلوقتي أنت شايل كل ده في جهاز بحجم إيدك عادي كده، طفرة!
ودي عدت بمراحل كتير جدًا، في مننا اللي عاصرها من أولها، وفي اللي بيسمع عنها من اللي أكبر منه بصيغة نوستالجيا. البداية الرسمية لأول موبايل في العالم كانت في 1973، لكن بالنسبة لينا احنا، بنعتبر بداية الموبايلات هي موبايل نوكيا 5110.
موبايل بكيبورد
ومن النوكيا اللي ماكانش فيه أي اختراعات غير إنه يقول ألو، أخرك فيه تلعب لعبة التعبان لحد ما وصلنا لطفرة البلاك بيري، والاختيارات بقيت موجودة بمعنى الكلمة وشوفنا الاختراعات والانبهارات، تخيل يا أخي موبايل بكيبورد! بتبعت بيه رسايل طول الوقت وتتواصل مع أصحابك وتدخل على النت كمان، حوار!
سمارت فون
ودلوقتي، بتقدر توصل للي أنت عايزه في أي وقت، كان نفسنا نقول إفيه “بضغطة زرار” بس حتى ده بقى قديم، وبنوصل لبعض بالـ smart phones بخمسين ألف طريقة بمجرد لمسة، وchats في كل السوشيال ميديا، ده دلوقتي.. وفي الجاي بقى متوقع إن تقنية الهولوجرام اللي شوفناها في حفلات غنائية، إن كمان نقدر نستخدمها كوسيلة تواصل بيننا.. الهولوجرام اللي خلانا نقدر نشوف صوت وصورة أي فنان بنحبه حتى لو مابقاش موجود معانا دلوقتي، شوفنا ده في حفلات غنائية لأم كلثوم وعبدالحليم.
هولوجرام
يعني في يوم من الأيام ممكن تلاقي إنك ممكن تتصل بصاحبك وتلاقيه واقف جنبك كده عادي، يعني هنعدي مرحلة إننا بنتصل ببعض فيديو كمان وبنشوف بعض حتى لو بيننا بلاد، كل ده كمان ممكن يتطور وفي خلال السنين القليلة الجاية.. مش بنتكلم عن أحلام 100 سنة مثلًا وعربيات بتطير وكده.
كل التطور ده ولسة الذكاء الاصطناعي بيعتبره العلماء في مراحله الأولى وبيشبهوه بالطفل اللي لسة بيحبي.. متخيلين في السنين الجاية ممكن نوصل لإيه لما الذكاء الاصطناعي يتطور أكتر؟ تفتكروا مميزاته وقتها هتغنينا عن النظر في عيوبه اللي العالم كله خايف منها؟