لما نيجي نتكلم عن بلد المكسيك، من أوائل الحاجات اللي بتيجي في بالنا هو الأكل السبايسي أو الحار، والتاكو الشهير. التاكو أو الـ tacos هو طبق مكسيكي يتكون من تورتيلا مطوية أو ملفوفة وبتكون مليانة بخلطات مختلفة، زيّ اللحمة المفرومة أو الفراخ أو الفاصوليا. والمكسيك مشهورة بيه لكونه طبق مختلف وبيعجب معظم الأذواق. علشان كده، في حالة السفر للمكسيك، حبينا نجمع لكم في المقالة دي أشهر الأماكن اللي بتقدم أطباق تاكو هناك.
تاكيريا الكايفان – Taqueria el Caifan
مطعم مريح متخصص في تقديم الأطباق الكلاسيكية، بما فيهم سندويشات التاكو والكيساديلا اللي بيتكون من عيش التورتيلا وجبن مقطوع على الطريقة الإيطالية أو مبشور وقطع من لحم السلطعون المصفى أو الفراخ المطبوخة أو خضار سوتيه مع الصلصة. بيتم تقديم كمان طبق الكارنيتاس والأطباق اللي المكسيك مشهورة بيهم. علشان تتعرف على الخيارات والأطباق اللي بيقدموها. وعنوانهم، ممكن تزور موقعهم الإلكتروني.
لوس كوكويوس – Los Cocuyos
Cocuyos عبارة عن مطعم صغير أشبه بـ station بيطل على الشارع مع وجود كراسي بلاستيكية وترابيزات، ولكن معظم الزوار بيخناروا إنهم بقفوا أثناء الأكل. ماتستقلوش بالمكان.. زىّ ما في مصر مابيكونش في أحلى من طعم ساندوتش الفول من على عربية فول أصيلة، نفس الكلام بيحصل مع محلات التاكو الصغيرة في المكسيك! هتلاقوا تقييم الزوار للمكان على الإنترنت إيجابي جدًا وتقدروا تلاقوا العنوان هنا.
تاكيريا أورينوكو – Taquería Orinoco
افتتح المطعم سنة 2017 ولكنه قدر يعمل سمعة وضجة كبيرة في المكسيك. من أول شكل المطعم النمطي اللي فيه البلاط الأبيض والـ posters الصاخبة والكراسي البلاستيكية القابلة للطي اللي بتدخلك في الموود لحد أطباق التاكو اللي بيستشهد بيها الزوار.. المكان ده هو المطعم المثالي علشان تحس بتجربة مكسيكية كاملة. لتفاصيل زيادة عن المطعم وعنوانه، تقدروا تزوروا موقعهم.
تاكوس الويكيتو – tacos el huequito
من الأماكن اللي شكل التاكو لوحدها هتخليك عايز تنط على أول طيارة للمكسيك بس علشان تروح على هناك وتدوق سندوتشات التاكو اللي بيقدمها المكان. تقدر تدخل على صفحتهم على الفيسبوك علشان تعرف أكتر عن الـ family truck اللي بتقدم أطباق مميزة من التاكو.
تيكيريا لوس بارادوس – Taquería Los Parados
من الأماكن المميزة في المكسيك اللي بتقدم الأطباق المكسيكية الشهيرة زيّ سندويشات التاكو والكيساديلا و الكارنيتاس. الـ reviews بتاعة زوار المكان أكدوا على قد إيه سندويشات التاكو بالستيك والجبن كان مميز ومن الحاجات اللي لازم تتجرب.
آخر كلمة: ماتفوتوش زيارة الأماكن دي لو روحتوا المكسيك!