النادي الأهلي هيواجه بالميرايس البرازيلي في نص نهائي كاس العالم للأندية
بواسطة: رحمة حجاج
النادي الأهلي المصري هيواجه نادي بالميراس البرازيلي في نص نهائي كاس العالم للأندية بكرا التلات في أبو ظبي.
الأهلي تأهل لنص النهائي بعد ما كسب مونتيري المكسيكي يوم السبت اللي فات في ربع النهائي بعد ما محمد هاني جاب الجول الوحيد في الماتش. وكان الماتش ده إثبات كبير إن الأهلي قادر يكون موجود ويلعب بأداء كبير ويكسب حتى ومعظم اللاعبين غايبين. معظم اللاعبين كانوا غايبين بسبب الإصابات وكمان بسبب وجود جزء كبير من اللاعبين مع المنتخب المصري في بطولة أمم أفريقيا. وجمهور النادي الأهلي كان بيردد على السوشيال ميديا “الأهلي بمن حضر” تعبيرًا عن فرحتهم بالفوز. السنة دي هي السنة التانية على التوالي للنادي الأهلي إنه يلعب في كاس العالم للأندية.
النادي الأهلي هو تاني أكتر أندية العالم اللي شاركوا في بطولة كاس العالم للأندية بعد نادي أوكلاند سيتي النيوزيلندي اللي شارك في البطولة تسع مرات. والسنة دي هي السنة السابعة في تاريخ نادي القرن في إنه يشارك في كاس العالم للأندية. البطولة اتلعبت في خمس دول خلال تاريخها. والنادي الأهلي شارك في اليابان أربع مرات وفي المغرب مرة واحدة، ومرة واحدة برضه في قطر. والسنة دي أول مرة البطولة تتلعب في الإمارات العربية المتحدة. كاس العالم للأندية اتلعب قبل كده في البرازيل بس الأهلي ماشاركش فيها.
السنة اللي فاتت الأهلي أخد برونزية كاس العالم للأندية في قطر ٢٠٢١ على حساب بالميراس البرازيلي بعد ما لجأوا للوقت الإضافي وضربات الجزاء. وائل جمعة ومحمد أبو تريكة هما أكتر لاعبين الأهلي اللي شاركوا مع النادي الأهلي في كاس العالم للأندية. وبعدهم في الترتيب عماد متعب وبعدها محمد بركات وشادي محمد وأمادو فلافيو وأحمد فتحي وأحمد شديد قناوي.
ماتش الأهلي بكرا التلات هيكون الساعة ستة ونص بتوقيت مصر. وماتش نص النهائي التاني هيكون بين نادي الهلال السعودي ونادي تشيلسي الإنجليزي، والماتش هيكون يوم الأربع اللي جاي.