النهارده هينطلق كأس العالم للأندية في قطر، واللي بيشارك فيه الأندية أبطال القارات وبطل دوري الدولة المستضيفة، والبطولة اللي بدأت من سنة 2000، كان تقريبًا كل سنة بيشارك فيه فرق عربية، ماعدا نسخة سنة 2015 و2016 ماشاركش فيهم أي فرقة عربية، وبما إن النهارده مباراة الافتتاح بين الأهلي والدحيل، فقولنا نفكركم بتاريخ مشاركات الأندية العربية في البطولة.
مصر
الأهلي اللي يعتبر من أكتر الأندية المشاركة في البطولة، والفريق المصري الوحيد اللي شارك في البطولة، وشارك الأهلي لأول مرة في نسخة 2005 وحصل على المركز السادس، وفي 2006 حصل على أفضل مركز ليه وهو التالت، وفي 2008 حصل على المركز السادس، وبعد كده في 2012 فاز بالمركز الرابع، وفي آخر مشاركة ليه في 2013 حصل على المركز السادس.
السعودية
شاركت الأندية السعودية من أول نسخة للبطولة في سنة 2000، لما شارك فريق النصر السعودي وخرج من دور المجموعات، وتاني مشاركة كانت لفريق اتحاد جدة في 2005 وحصل على المركز الرابع، وآخر مشاركة كانت لفريق الهلال في 2019 وحصل على المركز الرابع.
الإمارات
أول مشاركة للأندية الإماراتية في كأس العالم للأندية كانت في 2009، لما شارك فريق شباب الأهلي دبي وحصل على المركز السابع، وبعد كده في 2010 حصل فريق الوحدة على المركز الثاني، وفي 2017 شارك فريق الجزيرة وحصل على المركز الرابع، ولكن فريق العين حقق في 2018 أفضل مركز لفريق عربي لما حصل على المركز التاني.
تونس
بداية الأندية التونسية كانت في سنة 2007، لما شارك النجم الساحلي في البطولة وحصل على المركز الرابع، وبعد كده شارك الترجي في سنين 2011 (المركز السادس)، و2018 و2019 وحصل على المركز الخامس في السنتين.
المغرب
الرجاء المغربي شارك في 2000 وخرج من دور المجموعات، وبعد كده في سنة 2013 حصل على المركز التاني، وده كان أحسن مركز لفريق عربي وقتها، وبعد كده المغرب التطواني شارك في سنة 2014 وحصل على المركز السابع، وفي 2017 شارك الوداد وحصل على المركز السادس.
قطر
فريق السد هو الوحيد اللي شارك قبل كده من قطر في البطولة سنة 2011 وحصل على المركز التالت، وفي سنة 2019 حصل على المركز السادس.
الجزائر
المشاركة الوحيدة للأندية كانت في سنة 2014، لما شارك فريق وفاق سطيف وحصل على المركز الخامس.
آخر كلمة: بنتمنى التوفيق لكل الفرق المشاركة في البطولة.