لما تفتح الفيسبوك، لازم هتلاقي من ضمن العدد اللانهائي من الميمز الموجود، حاجات كتير عن الشغل. زيّ مثلًا “هو يوم الخميس جاي امتى” وحاجات تانية كتير متعلقة بأماني الناس إن وقت الشغل يقصر أو يعدي بسرعة.. بس مين كان يتخيل إن الحلم ده ممكن يتحول لحقيقة في أحد البلاد العربية! أسبوع العمل في دولة الإمارات، بقى أقصر دلوقتي، ومواعيد أجازتهم كمان اتغيرت.
أعلنت الحكومة الإماراتية يوم التلات، عن اعتماد نظام جديد للعمل الأسبوعي. فهيكون أسبوع الشغل أربع أيام ونص يوم فقط في الإمارات. والأجازة هتكون يوم السبت والأحد. وبالتالي يوم الجمعة هيكون يوم عمل بينتهى الساعة 12 الظهر. وده هينفذ ابتداءً من 1 يناير 2022.
ووفقًا لوكالة الأنباء الإماراتية، القرار هيطبق على كل الجهات في القطاع الحكومي الاتحادي في الدولة، بحيث هتكون ساعات الدوام الرسمي بناءً على القرار الجديد من الساعة 7:30 صباحًا لـ3:30 بعد الظهر من الاثنين للخميس وده بيعادل 8 ساعات عمل. ومن الساعة 7:30 صباحًا لـ12:00 الظهر يوم الجمعة (4 ساعات ونص) وهيتم الإعلان لاحقاً عن ساعات الدوام في المدارس الحكومية في الدولة.
وهيتضمن النظام الجديد إمكانية تطبيق ساعات الدوام المرنة و”نظام العمل عن بعد” يوم الجمعة في الجهات الاتحادية، “على أن تقر الجهات الاتحادية آليات التنفيذ، وبما تقتضيه مصلحة سير العمل في هذه الجهات” – وفقًا لما ورد في البيان.
وضحت وكالة الأنباء إن النظام الجديد هيساعد في تعزيز اندماج الاقتصاد الوطني مع مختلف الاقتصادات والأسواق العالمية، وهيعزز من موقعها الاستراتيجي المهم والفاعل في الاقتصاد العالمي، خصوصًا إن النظام الجديد للعمل الأسبوعي فيه تطابق أيام التبادلات والتعاملات التجارية والاقتصادية والمالية مع الدول اللي أيام أجازتها الأسبوعية بتكون يوم السبت والأحد.