من وقت الكورونا، اتعطلت كتير من عمليات السفر بسبب الـ lockdown اللي اضطرت تقوم بيه كتير من البلاد، وإغلاق حركة الدخول والخروج منها، للحد من انتشار الفيروس، والسفر بقى للضرورة فقط فمش أي حد كان بيقدر يسافر أو يحصل على تأشيرة.
وبالرغم من إن وضع الطيران ورحلات السفر اتحسنت وبتتحسن كل فترة، إلا إن بالتأكيد لسه النشاط الجوي مارجعش بنسبة 100% بسبب الـ restrictions في شروط السفر اللي فرضتها فيروس كورونا زيّ عمل مسحة قبل السفر وغيرها من الشروط. وفي ظل كل الظروف دي، قدرت دولة الإمارات العربية إنها تتصدر القمة من تاني، ويحصل جواز سفرها على المركز الأول عالميًا.
وفقًا لمؤشر “باسبورت إندكس” التابع لشركة آرتون كابيتال للاستشارت المالية العالمية، قدر جواز السفر الإماراتي التقدم منفردًا في المركز الأول عالميًا بدخول 152 دولة حول العالم، منها 54 دولة يتم الحصول على تأشيراتها عبر الإنترنت أو بمجرد الوصول، و98 دولة من دون تأشيرة مسبقة. وده من وقت صعوده للمركز الأول في ديسمبر 2018، فكان بيتاح لحامل جواز السفر الإماراتي دخول 178 دولة، منها 118 دولة من غير تأشيرة مسبقة، و60 دولة بتأشيرة إلكترونية أو وقت وصول المطار.
فتفوقت الإمارات على كتير من دول العالم، زيّ نيوزيلندا، اللي جواز سفرها جيه في المركز الثاني كأقوى جواز سفر في العالم، وبرصيد 146 دولة، منها 98 دولة مش بتطلب فيزا، و48 دولة تمنح حاملي جواز السفر النيوزيلندي الفيزا بمجرد الوصول للمطارات، وبتشترط 52 دولة الطلب المسبق للحصول على الفيزا.
أما المركز التالت من حيث قوة جواز السفر عالميًا، فاحتلته 9 دول وهما ألمانيا وفنلندا والنمسا ولوكسمبورج وإسبانيا وإيطاليا وسويسرا وكوريا الجنوبية وأستراليا. المركز الرابع كان من نصيب الدول الـ 6 اللي هما السويد وهولندا والدنمارك وبلجيكا والبرتغال وأيرلندا. أما المركز الخامس فحصل عليه جوازات دول فرنسا ومالطا وجمهورية التشيك واليونان وبولندا والمجر والمملكة المتحدة وكندا والولايات المتحدة الأمريكية.