وسائل تواصل مرينا بيها قبل عصر الواتساب والانستجرام

لأكتر من مرة، اتعرض العالم كله لعطل مفاجيء في أكتر من تطبيق؛ منهم واتساب وفيسبوك وانستجرام، العالم كله وقف وبقى في عزلة كاملة والناس ماكانتش عارفة تتواصل مع بعضها، ومنهم اللي راح للبديل ومنهم اللي حاول إنه يرجع لحاجة ماتعملتش من أكتر من 10 سنين وهو إنه يبعت SMS! الموضوع ده رجعنا تاني نفتكر هو قبل عصر السوشيال ميديا والإنترنت، الناس كانت بتتواصل مع بعضها ازاي؟

وسائل التواصل عمومًا مرت بمراحل كتيرة من أقدم العصور قبل ما توصل لشكلها الحالي، حبينا نجمع أشهرهم سواء في العصور القديمة أو في الألفينيات، لإن في الحالتين هما انقرضوا بالنسبة لنا.

في العصور القديمة أول حاجة الناس اعتبرتها وسيلة اتصال هي الكتابة على جدران الكهوف، وكانت بتبقى عبارة عن نقوش ورموز، وفي السنين اللي فاتت، اكتشفوا نصوص عمرها يرجع لـ30 ألف سنة، وكان في برضه الدخان كان معروف في الحضارة الصينية وكانت العساكر بتستخدمها كنوع من أنواع الإنذار في حالة الحروب.

وكان من ضمن وسائل التواصل القديمة برضه الحمام الزاجل، استخدموه في المراسلات بين الناس خصوصًا في أوقات الحرب، كانوا بيعرفوا خط سير الحمام وبيربطوا الرسالة في رجله علشان توصل للجيش، ومن بعدها ظهر البريد والتلغراف والفاكس بالتدريج لحد ما وصلنا لمرحلة التيلفون والمرحلة دي طولت معانا شوية من مرحلة تيلفونات البيت لحد الموبايلات، وبعدها ظهر الإنترنت سنة 1991 وبالتدريج برضه بدأ يظهر وسائل نقدر نتواصل بيها من خلال الإنترنت زيّ الـ Yahoo Email والـ MSN والـSMS، ولإن كل حاجة بتظهر بتاخد وقتها وتختفي وبيظهر بعدها حاجات مناسبة أكتر للتطور التكنولوجي وعصر السرعة اللي بقينا فيه.

عن: tech
عن: ux

فهنلاقي إن المكتسح دلوقتي هو عصر السوشيال ميديا والمتمثل في الفيسبوك وانستجرام والواتساب، واللي لما حصل فيه عطل لساعات قليلة، حصل بعدها حاجة أشبه بالعجز في التواصل والناس ماكانتش عارفة توصل لبعضها ازاي، فلجأت لحاجات كانت مرمي عليها التراب ومردومة من سنين. بس ياترى هييجي وقت على الفيس بوك والواتساب وغيرهم وهيتردم عليهم التراب؟

أخر كلمة: ماتفوتوش قراءة: إيه اللي حصل في 6 ساعات انقطاع عن فيسبوك وانستجرام وواتساب؟

تعليقات
Loading...