حلقة سعد لمجرد في برنامج سهرانين اللي بيقدمه أمير كرارة، من وقت الإعلان عنها سببت جدل كبير على السوشيال ميديا وفي الإعلام، ومطالبات الناس بوقف عرضها بسبب اتهام سعد لمجرد في قضايا تحرش واغتصاب في الـ 10 سنين اللي فاتوا. وانتشر هاشتاج #مش_عايزين_سعد_لمجرد_في_مصر بشكل كبير جدًا. ونتيجة ده، سعد مسح برومو الحلقة وميعادها، وده خلى تساؤلات كتير تتطرح عن مصير الحلقة وهل هتتعرض ولا لأ.
وبعد ما عدى وقت على كل ده، دلوقتي سعد لمجرد بيجدد الترويج للحلقة ونشر برومو جديد على صفحته على انستجرام، ووضح إن تم عمل تعديلات في الفيديو، مش إن المشكلة كانت في رفض وجوده هو شخصيًا واستضافته في برنامج بشكل طبيعي.
ولقينا هاشتاج #جمهور_لمجرد_منتظرين_سهرانين تريند على تويتر، بس الغريب إن لما جينا ندخل عليه، مالقيناش tweets كتير، واللي موجودين مالهمش أي علاقة بالموضوع، وقليل جدًا اللي ليهم علاقة، وغالبًا من نفس الأكاونت، والظاهر إنه تريند fake. كمان بعض الناس خدوا بالهم من الموضوع.
هل دي مقدمات بتسبق عرض الحلقة بعد كل الجدل اللي سببته؟ ده شيء مش مقبول، والناس مش هتنسى إن في شخص تم اتهامه في أكتر من قضية، في جرائم بناخد خطوات كتير علشان نحاربها، وفجأة وبمنتهى السهولة نشوف تسامح مع متهم في القضايا دي وبيتم الاحتفاء بيه بشكل طبيعي ودعمه.