مع الوقت، وكثرة إنتاج المنصات الأونلاين المختلفة لمسلسلات وأعمال فنية كتير بقت تفوق الإنتاج التليفزيوني أو اللي المسلسلات اللي اتعودنا إنها بتكون في موسم رمضان، بأجواء خاصة بالشهر واللمة، كمان المسلسلات الأوف سيزون زيّ ما بيطلق عليها، اللي ابتدينا نشوفها حاليًا بوجود ملحوظ طول السنة مش بس في رمضان، لكن مع كل ده، المنصات الأونلاين بتشهد إقبال مالوش مثيل، لكن هل ده بيخلي مشاهدة التليفزيون موضة قديمة؟ احنا مش بنعمل مقارنة بشكل جد أو بأرقام وصناعة أعمال فنية وكلام كبير، احنا بنفكر كمشاهدين كمان، في الأسباب والنتايج اللي شايفينها قدامنا دلوقتي بشكل بسيط وبنشاركه معاكم.
تليفزيون ولا منصة؟
بنشوف كتير إن الناس خصوصًا من جيل الشباب، بتتعامل مع التليفزيون إنه مجرد حاجة عاملة دوشة تونسهم وهما عايشين حياتهم العادية، أو إنه بنشوفه مثلًا واحنا قاعدين ناكل وعايزين حاجة تشتغل في الخلفية تسلينا، أو إنه مجرد رقم في قائمة طقوس شهر رمضان، بنتفرج عليه مع لمة العيلة وغيرها من الطقوس المرتبطة معانا بالشهر ده، لكن إن نروح نفتحه ونتابع عليه حاجة بعينها، دي مابتحصلش، وأغلبهم بيتابع المسلسلات الجديدة على المنصات المختلفة أونلاين.
مع إيجابيات المشاهدة أونلاين، وإنك مجرد ما تفتح في ثانية يكون عندك أي مسلسل أو عمل فني عايز تشوفه، في الوقت اللي أنت تحدده وفاضي فيه، وكمان من غير فواصل إعلانية، كل دي حاجات بتخلي الناس تنجذب للمشاهدة أونلاين، لكن التليفزيون لسه له سحر خاص يجذب مشاهديه، وفي اللي بيشوفوا إنها متعة مجرد إنك متابع مسلسل وبتستناه كل يوم في معاد معين وده يعتبر طقس يومي أو حاجة في روتينك، بتحس إنك مشدودله أكتر من فكرة إنك تجيب اللي أنت عايزه في أي وقت.
ليه بعدنا عن التليفزيون؟
ماننكرش إن في سبب كان عامل رئيسي في بُعد معظم الناس عن التليفزيون، خصوصًا في رمضان، وهو كثرة الإعلانات بشكل مبالغ فيه، تتفرج على 5 دقايق من المسلسل، بعدها نص ساعة إعلانات، وده خلى حتى الناس اللي بتؤيد فكرة متابعة التليفزيون عن المنصات، يبعدوا عن مشاهدته ويزهقوا، لدرجة إنهم ممكن يبطلوا يتابعوا العمل الفني نفسه مهما كانوا حبوه أو مستمتعين بيه وحابين النجوم اللي بيشوفوهم فيه، ويمكن السبب ده بتحاول جهات كتير تحلّه في الفترة الأخيرة.
هل ممكن يكون اتجاه المسلسلات نفسه وطريقة المعالجة واختيار الأفكار اللي بتنتجها المنصات، عامل مهم في جذب المشاهدين وبيخلي التليفزيون موضة قديمة؟ علشان الناس بتحس إن المحتوى نفسه مختلف وأقرب للواقع اللي بيعيشوه؟ أو طريقة المعالجة والتناول نفسها بتختلف وبقت واقعية أكتر من المسلسلات اللي اتعودوا يشوفوها في التليفزيون؟