أكدت نيفين القباج وزيرة التضامن الاجتماعي خلال لايف على clubhouse، إن هيتم التعاون مع وزارة الإتصالات لإنشاء موقع إلكتروني لتوفير فرص عمل لأصحاب الهمم من القادرين على العمل، وده من ضمن جهود قبل كده قامت بيها الدولة لتمكينهم.
ومؤخرًا شوفنا خطوات مهمة أخدتها الوزارة والحكومة كان من ضمنها ميكنة كل مكاتب التأهيل المنتشرة على مستوى الجمهورية لتسهيل الخدمات اللي بيتم تقديمها، ومش بس كده ده تم تدريب العاملين في 220 مكتب من مكاتب التأهيل، واشتغلوا على تطوير قدرات الأخصائيين الاجتماعيين، وعمل قاعدة من البيانات المتكاملة مش بس علشان يرصدوا أعداد أصحاب الهمم، لأ ده كمان علشان تبقى محاولة ليهم في تخفيف من حدة الإعاقة وتقديم مساعدة ليهم، وده في حالة لو تم تحليل قاعدة البيانات بشكل مبكر.
وفي السنة دي تم دمج 368 طالب وطالبة من ضعاف السمع بكليات التربية النوعية في تسع جامعات مصرية، وده من خلال دعم أجور مترجمين لغة الإشارة، بجانب تقديم منح دراسية بيتم صرفها على مرحلتين للطلبة المكفوفين.
ومن ضمن الجهود برضه اللي بتقوم بيها الدولة، توفير خدمات المكتبات السمعية وبرامج اللفظ المنغم، والسماعات الطبية والخدمات التعليمية عن طريق تعليم الكتابة بطريقة برايل للطلبة المكفوفين، وتوفير السماعات الطبية للأطفال تمهيدًا لدمجهم في المجتمع والتعليم.
وهيتم إطلاق حملة لتوفير أجهزة تعويضية وأدوات معينة زيّ لاب توب ناطق للمكفوفين، وده في إطار البرنامج القومي لتطوير القرى المصرية “حياة كريمة”.
نسبة أصحاب الهمم في مصر أكتر من 10% في مصر، ودي مش نسبة قليلة ماينفعش نتجاهلها، ولازم يتحطوا في الاعتبار واحنا بنعمل أي خطوة هدفها الأساسي خدمة المواطنين في البلد.