مركز شباب النصر في محرم بك بالإسكندرية بقى دلوقتي فيه أول حديقة ترفيهية للأطفال ذوي القدرات الخاصة في مصر بمجموعة من الألعاب البسيطة والمراجيح المناسبة لكل الأطفال اللي بيستخدموا الكراسي المتحركة، وغيرهم من ذوي الاحتياجات الخاصة في مساحة خضراء مُناسبة لكل أفراد العائلة.
بالإضافة للألعاب والمقاعدة المُجهزة لاستقبال أي شخص من أصحاب الهمم، الحديقة كمان فيها دورة مياة خاصة لاستخدام الأطفال على الكرسي المُتحرك، وتصميم وتنفيذ منطقة الألعاب الجديدة كان بالتعاون بين نادي روتاري إسكندرية الرمل ومديرية الشباب والرياضة في المحافظة.
النادي اتبرع بتكلفة التنفيذ اللي بلغت 250 ألف جنية، وكل مكونات الحديقة مصنوعة محلياً مع مراعاة المواصفات والأبعاد القياسية والأكواد العالمية اللي بتضمن سلامة الأطفال، والمكان ده تم اختياره بحيث يوفر الحماية والأمان واستمرارية الألعاب لأطفال المنطقة.
الحديقة دي بتمثل المرحلة أولى للنوعية دي من ألعاب الأطفال في مراكز الشباب المصرية، وهيتم تعميم المبادرة على مراكز الشباب التى بها شُعب لذوى القدرات الخاصة في الإسكندرية قريب جدًا، بالإضافة لوجود جهود لتعميم الفكرة على مستوى الجمهورية علشان يقدر الأطفال من ذوي القدرات الخاصة إنهم يستمتعوا ولو بجزء بسيط من حقوقهم وطفولتهم زي الأطفال الأصحاء.
