بما إن معظم السنة دي قضيناها قعاد في البيت بسبب كورونا، فكان معظم وقتنا بنقضيه في الفرجة على المسلسلات الجديدة.. وعلى عكس السنة دي اللي ماكنتش مثمرة أوي بسبب تعطيل حركة العالم كله خوفًا من العدوى، الصعيد الفني كان مثمر جدًا وخرجلنا أعمال مش بس مهمة ولكن مؤثرة بشكل شخصي على الجمهور.. في اللي كان مؤثر بشكل إيجابي وفي اللي بشكل سلبي، ولكن في النهاية الأعمال دي عملت جدل وقلبان على السوشيال ميديا، فتعالوا نفتكر بعض الأعمال دي..
الاختيار
موسم رمضان اللي فات ماكنش حد بيتكلم في حاجة غير المسلسل اللي حرفيًا بكى مصر كلها وخلى نسبة الوطنية عند كل واحد فينا تعلى حبيتين تلاتة أربعة كده! الأحداث المستوحاة من حقيقة اللي حصل في ملحمة البرث والتعاطف اللي حسينا بيه مع كل بطل شوفناه، خلانا نحس بكل حاجة حصلت هناك وكأننا كنا معاهم، وتأثيرها النفسي علينا فاق كل التوقعات، حتى توقعات أصحاب العمل نفسه، اللي ماتخيلوش كم ردود الأفعال الإيجابية اللي جاتلهم!
حكايات بنات الجزء الخامس
تقريبًا مفيش حد في مصر ماتفرجش على الأجزاء الأولى من المسلسل اللي حققت نسب مشاهدة عالية جدًا وقعد المسلسل ده فترة مش قليلة حديث السوشيال ميديا.. ولكن خلال الأجزاء اللي بعد كده ومع تغير cast المسلسل بالإضافة للمواضيع اللي بتطرح.. بدأ يحصل هجوم كبير على المسلسل وجدل بسبب المواضيع اللي بيتكلموا فيها وإن السياق في تفتح زيادة بالنسبة للمجتمع المصري المعروف بطبيعته الشرقية. ورغم الهجوم اللي حصل إلا إن نسب المشاهدة كانت بتقول عكس كده لإنها استمرت في الارتفاع برغم كل حاجة.
مسلسل إلا أنا حكاية #لازم أعيش
حصل ضجة كبيرة على قصة جميلة عوض في مسلسل إلا أنا، اللي كانت بتتكلم عن مشكلة مش كتير أبدًا اتكلموا عنها وهي مرض البهاق أو الـ vitiligo اللي بيسبب أزمات نفسية وعوائق كتير للي بيصاب بيه.. ومن خلال حبكة درامية جميلة ومؤثرة في عرض القصة، الكل كان منفعل معاه ومنبهر بطريقة عرض المشكلة.
مسلسل البرنس
هو كده كده محمد رمضان أي حاجة بيعملها سواء أغنية أو مسلسل أو غيره بتعمل جدل أو بتبقى تريندينج ، ولكن بطريقة مختلفة مسلسله لرمضان السنة دي “البرنس” كان مؤثر للأحداث الإنسانية زيّ مشهد لما رمى أحمد زاهر بنت أخوه في الشارع اللي شوفنا عليها ميمز كتير بعد كده، ولكن في الأول كان الكل بيتكلم قد إيه المشهد كان مؤثر.
مسلسل نمرة اتنين
لإن التليفزيون المصري محكوم بأطفال، وبقواعد ماينفعش تتكسر وكمان في رقابة، ففي معظم المسلسلات بيبقى في حدود محدش بيعديها، ولكن مسلسل نمرة اتنين جيه بمنتهى البساطة وكسر كل القواعد دي، وعمل جدل كبير بسبب الكلام والمشاهد اللي ماتعودناش كمشاهدين نشوفها في مسلسلات عربي.. ولكن ده مايمنعش إن المسلسل حقق نجاح ساحق، بالذات إن cast المسلسل كان قوي وكبير جدًا.
مسلسل ليه لأ
طبعًا مش محتاجين نتكلم إحنا قاعدنا كام أسبوع نشوف ميمز وهجوم على فكرة المسلسل وإزاي جابوا إن عادي واحدة تهرب يوم فرحها وتسيب وراها خطيبها وعيلتها واختارت تعيش لوحدها علشان تبدأ من جديد. فحصل صراع كده بين مشاهدين الفيلم اللي مؤيديين ليه وشايفين إن ده اللي بيعرض قضية المرأة والمطالبة بالحرية بجد، وبين اللي كان مش موافق على طريقة عرض ومناقشة القضية.. وأيًا كان انت واخد أنهي طرف فيهم، ففي النهاية إحنا مانقدرش ننكر إنه عمل ضجة على السوشيال ميديا وحقق نسب مشاهدة و “word of mouth” عالية جدًا.
مسلسل بـ 100 وش
نيجي للحلاوة كلها، وللمسلسل اللي أثر فينا بس بشكل سعيد! وسط كل المشاكل والقضايا المهمة اللي ناقشتها بعض المسلسلات، جيه المسلسل ده بروحه المرحة علشان يهون علينا كل حاجة، من تناغم بين فريق العمل وخفة دمهم لحد أغنية مليونير، المسلسل ده متكامل بكل المقاييس، وبشهادة الجميع!