انتشر كلام وأخبار كتيرة في الفترة الأخيرة إن هيكون في تعاون جديد بين الفنانة الكبيرة العظيمة هند صبري والفنانة الكبيرة الجميلة سوسن بدر مع إنتاج لشركة نتفليكس الكبيرة لعمل جزء تاني وجديد لمسلسل “عايزة أتجوز”، المسلسل الكوميدي اللي شوفناه في رمضان سنة 2010، وكان من بطولة هند صبري، وسوسن بدر، ورجاء حسين، وأحمد فؤاد سليم، وطارق الإبياري، ومن تأليف غادة عبد العال، ومن إخراج رامي إمام، وكان في ضيوف شرف من ألمع النجوم كل حلقة زيّ أحمد السقا، ويوسف الشريف، وإدوارد، وتامر هجرس، وأحمد رزق، وعمرو يوسف، ونضال الشافعي، وفنانين تانيين كتير.
والمسلسل بيناقش قضايا الجواز بطريقة ساخرة وفي نفس الوقت حقيقية، ولما سمعنا إن هيتعمل منه جزء تاني تحت اسم “عايزة أتطلق” من إخراج هادي الباجوري وإن التحضيرات هتبدأ في الأسابيع اللي جاية بعد الانتهاء من تعاقدات الفنانين المشاركين في العمل تحمسنا جدًا، ولكن الخبر ماتمش تأكيده أو نفيه لسه فمش عارفين إذا كان الخبر إشاعة ولا بجد.. بس لغاية ما أي حد من الجهات المشتركة في العمل يأكدوا الخبر الجميل ده، تعالوا نتفرج على أكتر المشاهد واللقطات المضحكة والجميلة من الجزء الأول لمسلسل “عايزة أتجوز”.