ليه لازم تزور شرم الشيخ في رأس السنة؟ دي قائمة بأحسن الأماكن والأنشطة فيها

في رأس السنة كلنا بنحب نغير جو ونستمتع بأجواء الأعياد والاحتفال بالسنة الجديدة، كلنا بندور على أماكن نقضي فيها رأس السنة بشكل مختلف، وبما إن السنة دي مختلفة بكل الأشكال، والسفر مش متاح بشكل عادي، فده الوقت إننا نكتشف أكتر أماكن في بلدنا ونشجع السياحة الداخلية ونشوف الجمال المختلف اللي بتتمتع بيه مصر، وشرم الشيخ بتتميز بجو دافي ومناسب للأجازات في الوقت ده من السنة، علشان كده جبنالك أماكن في شرم الشيخ ماينفعش تفوت زيارتها في رأس السنة بكل التفاصيل اللي هتحتاجها.

ألف ليلة وليلة

من أحلى الأماكن في شرم الشيخ وأكتر مكان بيجذب السياح لإنه بيجمع بين أجواء مختلفة وسحر خاص بيه وبيقدم خدمات وفقرات متنوعة ترضي كل الأذواق، من عروض الصوت والضوء للرقصات الشعبية المصرية للأمسيات الغنائية والفنية، القرية في منطقة هضبة أم سيد وتقدر تروحها من هنا، أسعار تذاكر الدخول إلى عروض ألف ليلة وليلة للمصريين: 250 جنيه للفرد، ولغير المصريين 25$ للفرد.

سوهو سكوير

لو عايز تقضي وقت من التسوق والمرح وتشتري هدايا وتستمتع بالمطاعم والكافيهات في مكان مميز، لازم تروح سوهو سكوير، اللي بيوفرلك كل ده في أجواء ساحرة هتخليك تحس بكل أجواء العيد والاحتفالات، وهناك كمان تقدر تزور بازار خان الخليلي اللي مابيختلفش كتير عن اللي في القاهرة، وتقدر تروح من هنا

القارب الزجاجي

لو بتحب تحتفل بشكل مختلف، وبتحب أجواء البحر الأحمر والغوص وسط الشعاب المرجانية اللي موجودة في شرم الشيخ فماينفعش تفوت تجربة زيّ دي، تقدر تروح في رحلة غوص في القارب الزجاجي من خلال غواصة بتخترق بيك حدود بحر شرم الشيخ الصافي وتشوف المخلوقات البحرية الفريدة من نوعها والشعاب المرجانية.

سفاري

وده نشاط مش ممكن يقدم أو تروح عليه مهما طلعت أنشطة تانية، بتتميز بيه شرم الشيخ لجمالها وسحرها، للناس اللي بتحب تعمل رحلات سفاري، شرم الشيخ أنسب مكان لده في رأس السنة، وبيتم تنظيم رحلات السفاري برنامج الرحلة كمان بيتضمن ركوب دراجات نارية مخصصة للصحراء بتاخد بيها جولة وسط الجبال، بالإضافة لسهرة مميزة وعشاء على الطريقة البدوية.. سعر الرحلة بيتراوح بين 300 لـ 600 جنيه، وماتنساش تاخد معاك شال ونضارة شمس وكوتشي رياضي.

كليو بارك

مدينة تعتبر واحدة من ضمن فعاليات شرم الشيخ المشهورة ماينفعش تفوتها، ويُعتبر أول منتزه مائي في سيناء وبتضم العديد من الزحاليق المتفاوتة في الطول والشكل، ومنطقة مخصصة للأطفال، وعدد من المطاعم ومحلات الهدايا، الأسعار هناك بتبدأ من 30 دولار للبالغين و20 دولار للأطفال فوق 4 سنين، ومجانًا للأطفال أقل من 4 سنين.

آخر كلمة: متفوتوش قراءة: في أرض السحر والجمال.. أماكن لازم تزوروها في دهب.