كلام كتير انتشر اليومين اللي فاتوا وكان حديث السوشيال ميديا وكل الناس بتتكلم فيه، وطلعت إشاعات كتير عن أخبار انفصال الهضبة عمرو دياب عن الفنانة دينا الشربيني اللي بتجمعهم علاقة حب ألهمت كتير من الناس وكانت وقتها برضه مجال كبير للكلام على السوشيال ميديا، وكمان انتشرت قصص عن أسباب انفصالهم، وردود أفعال الناس على الكلام ده كانت مختلفة، وكتير من الناس حولوها لكوميكس وميمز.. فتعالوا نشوف إيه الحكاية.
في البداية انتشر كلام عن انفصال عمرو ودينا وإنها سابت البيت وإنهم لغوا متابعات الحسابات الشخصية لبعض على السوشيال ميديا، ولكن أصلًا هو عمرو دياب ماكنش عاملها فولو، وكمان في البداية اتقال إن الخلافات دي بسبب غيرة عمرو.
وانتشرت ميمز عن الانفصال نفسه كمان، بإفيهات من كلمات أغاني عمرو دياب نفسها..
وانتشرت كمان قصص عن أسباب انفصالهم، فيه قالوا إنه بسبب الغيرة، وفيه قالوا إنه بسبب رغبة دينا الشربيني في الجواز الرسمي لكن بيمنعهم عنه موقف زينة عاشور زوجة عمرو دياب اللي لو تم زواجه من دينا ممكن زينة ترفع دعوى طلاق وتاخد نص ثروة عمرو، بموجب القانون البريطاني.
لكن محدش فيهم طلع ينفي أو يثبت الأخبار دي، وكلها لحد دلوقتي مجرد كلام حصل عليه تريند، طبعًا بسبب شهرة عمرو دياب ودينا الشربيني، كمان خصوصًا إن الموضوع ظهر بعد خلافات تامر حسني وزوجته بسمة بوسيل، اللي وقتها خدت شهرة كبيرة وبقت تريند كمان للفنانين اللي منهم حاولوا الصلح بينهم وبالفعل اتصالحوا في النهاية.