الشتا من الفصول المحببة عند ناس كتير وبيعتبروه فصل الأنتخة والقعدة تحت البطانية والفرجة على التلفزيون. ومع التلات حاجات دول لازم نجيب سيرة الأكل خصوصًا إنه من الفصول المعروف عنها الجوع الكتير، طول الوقت بتبقى جعان ومش عارف السبب إيه. وعلشان كده جمعنالكم مجموعة من الأكلات بتجمع ما بين حاجتين. الدفا والفيتامينات والمعادن اللي جسمنا محتاجها.
شوربة العدس
من الأكلات المقدسة والأساسية عند المصريين في الوقت ده. والاختيار الأول لأي أم لما الدنيا تسقع شوية “يلا نعمل عدس”. غير إنه بيدفي بدرجة كبيرة. فهو كمان مليان بالمعادن والفيتاميات وموجودين كمان في المكونات اللي بتتعمل معاه زيّ البطاطس والجزر. وفوق كل ده فهو محارب قوي للبرد!
السحلب
يمشي الاتنين أكل وشرب. لو عملناه خفيف نشربه ولو سِبناه شوية وزودنا البودرة يبقى عامل زيّ المهلبية ويتاكل بالمعلقة. وتقدر تاكله بالمكسرات أو من غير. بيدفي جدًا وطعمه حلو!
البطاطا
البطاطا من أحسن الأكلات اللي ناكلها في الشتا وفي أي وقت، لإنها من أفضل مضادات الأكسدة وبتحتوي على نسبة عالية من الكاروتين، ونسبة عالية من الألياف، وبتساعد على منع خلايا الجسم من التلف وبتحمي من سرطان الجلد والرئة والبروستاتا، وبتمد الجسم بكمية كبيرة من الطاقة اللي هتساعده إنه يتدفى. ودلوقتي بقت تتعمل بأطعمة كتيرة ولذيدة زيّ النوتيلا والكراميل وبقى في عربيات مخصوص دلوقتي تقدر تشتري منها.
حمص الشام
الناس بتستنى الشتا علشان تاكل حمص الشام من على العربية في عز التلج وهو مليان شطة علشان تقلل من لسعة البرد.
الكِشك
من الأكلات اللي مليانة بفوائد كتير لإن مكوناتها كتير. زيّ البرغل والزبادي واللبن والشوربة. وبتتعمل بأكتر من طريقة في الصعيد وفي الدلتا ومن ضمن الطرق إنه يبقى محشي فراخ.
القلقاس
زمان كانوا بيقولوا عليه ابن عم الملوخية والبطاطس، علشان يحببوا الأطفال فيه. وبعيدًا عن إن في ناس كتير مش بتحبه. بس هو أكلة مصرية شتوية أصيلة لازم تتقدر.
