التغير المناخي بيضرب الكوكب بكل وضوح وقوة. ولو كنت عايش في مصر فأكيد أخدت بالك إننا عايشين في واحد من أقسى فصول الشتا اللي عدت على البلد. وأخر الأخبار لحد دلوقتي، بتتنبأ بإن الطقس خلال الأيام اللي جاية هيمر بموجة صقيع وعاصفة ثلجية هتنخفض فيها درجات الحرارة لـ 4 درجات تحت الصفر. ظروف طقس متطرفة لو سألنا أهلنا وأجدادنا، هيقولوا لنا إنهم ماعاشوش فصل شتا بالبرودة دي في حياتهم.
أما ولاية كاليفورنيا اللي بتعيش فصل الشتا في اللحظة دي، فبتتعرض لحرائق غابات كبيرة جدًا على مساحة 1500 فدان، واللي اتسببت في عمليات إجلاء وإغلاق جزء كبير من أحد الطرق السريعة الرئيسية.
وقالت إدارة الغابات والحماية من الحرائق في كاليفورنيا إن فرق الإطفاء نجحت في احتواء خمسة في المئة من الحريق اللي اتسمى حريق كولورادو واللي اشتعل يوم الجمعة اللي فاتت ولسه مستمر لحد لحظة كتابة المقال.
وغير إن ده مش موسم حرائق الغابات، لكن قال الخبراء إنه حتى موسم حرائق الغابات في كاليفورنيا بقى أطول مدى وأشد إيلامًا في السنين اللي فاتت مع تفاقم آثار تغير المناخ.
علامات االتغير المناخي: شتاء قارص وصيف حارق
نتائج التغير المناخي عالميًا بتحول المواسم المناخية لأكتر ظروف متطرفة، وزيّ ما احنا عايشين فصل شتاء متطرف ودرجات حرارة أقل بكتير من العادي، فالصيف اللي جاي هيكون كمان متطرف بدرجات حرارة أعلى بكتير من اللي متعودين عليها.
كل سنة ظروف التطرف الموسمية هتزيد لحد ما نوصل لوقت هيكون فيه الشتاء متجمد والصيف حارق، وهيتحول الكوكب لبيئة عدائية hostile environment وغير مناسبة للبشر، وفي اللحظة دي مش هنعرف نعيش على الكوكب.
لو ماتحركناش النهارده علشان نحل أزمة التغير المناخي، النتائج الكارثية اللي بين إيدينا النهارده هتتفاقم لدرجة مفيش بعدها رجوع.
أسباب التغير المناخي
في أسباب كتير للتغير المناخي، ويمكن من أهم الأسباب دي:
إزالة الغابات: ولإن الأشجار بتمتص غاز ثاني أكسيد الكربون فبالتالي إزالة الغابات علشان الأخشاب أو الثروات الطبيعية اللي في الغابات أو بهدف خلق مساحات للزراعة بيقضي على أهم ماكينة تدوير ثاني أكسيد الكربون في الغلاف الجوي، وبالتالي الغاز ده عمال يتراكم في الجو وبيمتص حرارة الشمس وبيمنع خروجها للفضاء، وبيحول كوكب الأرض لصوبة بترتفع درجة حرارتها كل يوم أكتر.
الثورة الصناعية: التصنيع هو أهم وأكتر عنصر مسبب للتغير المناخي، لإنه من بداية الثورة الصناعية واستخدام الوقود الأحفوري وبيتم ضخ كميات ضخمة جدًا من غاز ثاني أكسيد الكربون وغازات تانية دفيئة في الغلاف الجوي، والدول الصناعية الكبيرة زيّ الصين والولايات المتحدة هي أكتر الدول الملوثة للكوكب، ولإن الصناعة هي عصب الاقتصاد العالمي المعاصر، فللأسف مفيش أي خطوات لتقليل أثرها المدمر على طبيعة الكوكب.
تربية الأبقار بكميات مهولة: يمكن ده واحد من أغرب الأسباب اللي أدت للتغير المناخي، لكن الحقيقة إن البقرة الواحدة بتنتج كميات من ثاني أكسيد الكربون أكتر من سيارة بتتحرك بالوقود الأحفوري، وبالتالي تربية الماشية بكميات ضخمة في المزارع بيسبب تراكم كميات كبيرة جدًا من الغازات الدفيئة اللي بتسبب ارتفاع درجة حرارة الكوكب.
نقدر نعمل إيه علشان نمنع التغير المناخي؟
احنا كأفراد للأسف، مفيش في إيدينا حاجة نقدر نعملها علشان نغير الواقع المرير ده بشكل مباشر، لإن القرارات اللي تقدر توقف تأثير الإحتباس الحراري بسرعة وحزم في إيدين حكومات الدول الصناعية والمؤسسات الصناعية الضخمة mega corporations.
وللأسف الحكومات والمؤسسات دي مش بتاخد أي خطوة علشان تغير الواقع الحزين ده، لإن الوضع الحالي بيساهم في تكوين أرباح ضخمة وده مش هيتخلوا عنه بسهولة.
أما الجانب الكويس إننا كأفراد نقدر ننشر الوعي الكافي بين الناس اللي حولينا عن تأثير التغير المناخي، ونقدر نستغل أصواتنا في إننا ننتخب وندعم الناس اللي بتحاول تغير الظروف اللي احنا عايشينها النهارده.