للأسف معلوماتنا عن الجرائم اللي ممكن تكون بتحصل بين الأزواج في الجواز ضعيفة جدًا، فمفيش غير الحاجات الأساسية جدًا اللي حوليها نوع من الوعي وبتقتصر معلومات كتير من الناس على معرفة مثلًا إن تعدد الزواج بالنسبة للست جريمة بيعاقب عليها القانون. بس هل ده النوع الوحيد من الجرائم اللي بيحصل في قضية الزواج؟ في قضايا كتير جدًا في ملف الجرائم في الزواج اللي جيه الوقت إن احنا نتكلم عنها والجدير بالذكر إننا شوفنا كتير من الجرائم دي بتُناقش في الأعمال الدرامية السنة دي، علشان كده حسينا إنها فرصة إننا نفتح المناقشة دي ونتكلم عن الجرائم الزوجية المختلفة، واللي شوفناها في مسلسلات رمضان المختلفة.
الزواج بالإكراه
في مسلسل نسل الأغراب، مى عمر كانت متجوزة أحمد السقا ولكن بعد بعض الصراعات وجرائم القتل اللي حصلت، دخل جوزها السجن، وبعد كده أجبره أمير كرارة إنه يطلقها وإتجوز مى عمر أو “جليلة” بالإكراه علشان كان بيحبها وعايزها تكون مراته، سواء هي كانت بتحبه أو لأ. وبرغم إن بعد كده خلال حلقات المسلسل جابوا إن بالوقت جليلة بدأت تحبه وخلفت منه كمان، إلا إن ده لا يقلل إطلاقًا من جرم اللي حصل، لإن شرط الجواز هو القبول والرضا من الطرفين.
الاغتصاب الزوجي
بالرغم إن لسه مفيش قانون بيجرم الفعل ده، ولكن الاغتصاب الزوجي جريمة بكل ما تحمله الكلمة من معنى، وبيرجع عدم معرفة كتير من الناس للنقطة دي، إن في اعتقاد خاطىء إن مفهوم “الاغتصاب” مقتصر بس على الرجال اللي بتعتدي على ستات لا يحلوا لهم، وإن طالما الشخص ده متزوج من ست، فمن حقه يجبرها على إقامة علاقة معاه عادي. العلاقة الزوجية لازم تكون برضا الطرفين وأي عامل من عوامل الغصب أو الإجبار في المسألة دي، اسمه جريمة واغتصاب زوجي. وفي لعبة نيوتن لما شوفنا مشهد هنا ومؤنس.. ده كان تجسيد واضح وصريح للنوع ده من الجرائم.
ابتزاز الزوجات
في مسلسل حرب أهلية، باسل الخياط هدد مراته إنه مصورهم مع بعض أثناء فترة زواجهم، علشان يجبرها إنها تستمر معاه وماتقدرش تتطلق منه. الابتزاز جريمة بشعة وحتى لو تمت من قبل الزوج فدي جريمة يعاقب عليها القانون ولو ده حصل في الحقيقة فالزوجة ممكن ترفع قضية وتحبس الشخص ده لمدة قد تصل لسبع سنوات في حال ثبوت تهمة الابتزاز والنصب.
التعدي بالضرب على الزوجة
مشكلة أزلية بنحاول نوعي الناس عنها بقالنا سنين. كون إن الشخص زوج، ده لا يعطيه الحق إطلاقًا إنه يتعدى على مراته بالضرب والإهانة أيًا كان السبب. وأي ست بتتعرض لده ممكن ترفع قضية علشان تضمن عدم التعرض أو تكرار الاعتداء. في مسلسل “اللي مالوش كبير”، شوفنا خالد الصاوي بيضرب ياسمين عبدالعزيز ضرب مبرح، واللي كان من أسباب كرهها ليه ومحاولتها في إنها تطلق منه.. لإن مفيش إنسان في الدنيا يستحق إنه يعيش حياه مهينة ومؤذية بتهدر من كرامته كل يوم. أي شكل من أشكال العنف ضد المرأة غير مقبول!
زواج القاصرات
في مسلسل لحم غزال وكمان مسلسل نسل الأغراب، ظهرت مى سليم إنها أم من وهي عندها 14 سنة وفي أول حلقة من مسلسل نسل الأغراب ظهرت مى عمر بتقول لأولادها أثناء هزارها معاهم إنها خلفتهم من وهي بنت 13 سنة علشان كده مش عايزاهم يكبروها ويقولوا إنها أمهم. وبرغم من إن في المسلسلين النقطة دي ماكانتش بتناقش على أساس إنها مشكلة، ولكن لازم نسلط الضوء على الموضوع ده ونفتكر إن الزواج للستات أقل من 18 سنة جريمة بيحاسب عليها القانون.
الخيانة الزوجية
من الجرائم الزوجية اللي تقريبًا كل مسلسلات رمضان ناقشتها السنة دي، هي مسألة الخيانة، واللي بيعتبر أشهر أنواع الجرائم الزوجية اللي الكل عارف مدى حرمانيتها وتجريمها دينيًا وقانونيًا, ولكن في مسلسل ضد الكسر بالذات، ناقشوا حاجة أكبر من الخيانة الزوجية وهو نسب طفل غير شرعي للزوج من خلال شخصية تارا عماد اللي حملت نتيجة إقامة علاقة مع شخص غير جوزها، ونسب الطفل ده للزوج.