3 طرق هيساعد بيها جروب “i make this” للتبرعات في رمضان لأول مرة

“i make this” جروب على فيسبوك لدعم المشاريع الصغيرة اللي بتقوم بيها الستات، وانتشر بشكل سريع جدًا وبقى ليه قاعدة كبيرة من المشتركين وصلت لحوالي 180 ألف، “i make this” يُعتبر مجتمع لرائدات الأعمال المصريات، بيساعد كل صاحبة مشروع مهما كان صغير، في إنها تعمل دعايا لمشروعها، من أكل لديكورات، أيًا كان المشروع، الجروب بيدعم إنك توصلي بمشروعك لعدد كبير من الناس، وهو بدأ في ديسمبر 2019، وفي وقت قليل قدر يكون ليه متابعين ومشتركين كتير، منهم صاحبات المشاريع، ومنهم اللي موجودين علشان يعرفوا كل جديد في البيزنس ويدعموا المشروعات دي ويشتروا من المنتجات، رانيا عاطف هي مؤسسة الجروب قررت إنها تبدأه لما لقت إن عملية التسويق صعبة ومكلفة، فعملت الجروب ده علشان الستات تعلن عن منتجاتهم مقابل دعوة أصحابهم ومعارفهم للانضمام للجروب.

السنة دي ولأول مرة، الجروب قرر يساعد بتبرعات لرمضان ومساعدة ناس أكتر، وده بـ 3 طرق مختلفين، عن طريق استغلال شهرة الجروب والموقع والأبلكيشن الخاصين بيه، أول طريقة هي إنهم هيفتحوا الجروب والويب سايت والأبلكيشن لجمعيتين هما: “تواصل” و”دنيتنا“، اللي بتبيع منتجات مختلفة، والـ access ده هيكون من غير مقابل، علشان يساعدوا الجمعيات دي في إنهم يوصلوا لجمهور أكتر ويقدروا كمان يتبرعوا بنسبة من المبيعات بتاعتهم.

تاني طريقة هي إن الجروب هيسمح لصاحبات المشاريع إنهم يحددوا نسبة من الأرباح بتاعتهم تروح لصالح التبرعات للجمعيات اللي الجروب بيتعاون معاهم، والطريقة التالتة هتكون إن أي حد حتى لو مش من أصحاب المشاريع يقدر يتواصل مع إدارة الجروب ويتبرع بشكل مباشر للجمعيات الخيرية دي، سواء كان في الجروب علشان يسوق لمشروعه، أو مجرد بيشوف ويشتري، عنده الفرصة إنه يتبرع ويساعد ناس أكتر في الشهر الكريم من خلال الجروب.

آخر كلمة: ماتفوتوش قراءة: “أنا بعمل دا”: جروب مصري على موقع فيسبوك أسسته النساء لخدمة النساء.

تعليقات
Loading...
Tweet
Share
Share
Pin