هل انت من الناس اللي بتحدف ملح على كتفها عشان يحرسها من الحظ السيء؟ لو آه، فانت بتعتقد في الخرافات!
الخرافة هي الاعتقاد بإن حدث معين حصل كنتيجة لحدث تاني مابترتبطوش بيه أي علاقة طبيعية أو حتى منطقية. بس ليه لأ؟ الموضوع دايمًا بيكون مُسَلي، دا غير إنه من الممتع إنك تقعد تسمع عن الخرافات وقصة بداية كل واحدة فيهم.
الخرافات منتشرة في كل دول العالم، بس أحيانًا نفس الفعل بيكون ليه معاني مختلفة حسب الدولة أو الثقافة اللي تأصل فيها. دي بعض الخرافات المشهورة في الشرق الأوسط:
عين الحسود
حاسس إنك عيان فجأة؟ عربيتك اتخدشت بدون مقدمات؟ خسرت وظيفتك كدا من لا شيء؟ كل دا نتيجة عين صابتك حسب المعتقدات العربية!
العين الشريرة أو عين الحسود هي لعنة سحرية بيرجع أصلها للعصور الأولى، وبتولّد خوف مستمر تناقلته الأجيال عبر الزمن. بيعتقد الناس إن الحسد بيفلق الحجر زي ما بيقولوا! وممكن ييجي في صحتك أو يموتك كمان بنظرة واحدة من الحسود بتصيب شيء ما أو شخص بنية الأذى.
فكرة الحسد واللعنة اللي مرتبطة بيه بيرجع أصلها لليونانيين القدماء وروما القديمة اللي كان بيعتقد الناس فيها إن أي مكروه بيصيب الإنسان بيكون نتيجة الحسد. ونتيجة لدا الناس ابتكرت أشكال كتير من الحماية ضد الحسد حوالين العالم، بس أشهر شكل من أشكال الحماية هو العين الزرقاء اللي انتوا شايفينها في الصورة دي.
لحد النهاردة فيه ناس كتير في العالم العربي بيصدقوا في قوة وتأثير نظرات الحسد، فمتستغربش من أي حد يقولك مجاملة وفي آخرها الجملة الشهيرة “ما شاء الله”، أو لو لقيت عيلتك بيلبسوا ولادهم لبس شكله وحش عمدًا أو بيطلعوا مشاكلهم كل شوية، كل الحاجات دي علشان بس يبعدوا الحسد.
خمسة
بالكلام عن الحسد، فيه شكل تاني من أشكال الحماية ضد الأذى سواء كان متعمد أو غير متعمد وهو علامة الخمسة، إنك تخمس أو تحط صوابع إيدك الخمسة في وش اللي قاصدلك الشر بيتقال إنه بيفك اللعنة.
لما بييجي الكلام عن الخرافات والحسد تحديدًا، العرب بياخدوا الموضوع بمنتهى الجد. فبتلاقيهم بيدبحوا خروف أو عجل ويحطوا دمه بصوابعهم الخمسة على الحاجات الجديدة اللي بيشتروها زي العربيات أو البيوت.
فلو حسيت إن حد بيحسدك فعلًا، خمس في وشه والشر هيبعد.
لقيت جزمتك على الأرض مقلوبة
حظك وحش أكيد يا صديقي! ممكن جدًا تسمع صوت زعيق جي من آخر المكان لو لقيت جزمة أو شبشب معووج في البيت لحد ما تعدله! فالعرب بيعتقدوا إن دي علامة على سوء الطالع والأحداث الغير سعيدة.
الخرافة دي بيرجع أصلها لوقت ما كان الناس بيعيشوا في بيوت أرضها مش نضيفة. حشرات زي العنكبوت السام والعقارب كانت بتدخل في الجزم وبالتالي تعمل لصاحب الجزمة مفاجأة سيئة جدًا لما يلبسها، وكان للأسف بيموت ناس كتير بسبب الموضوع دا لحد ما الناس ابتدوا ياخدوا بالهم منه، ومن ساعتها وهو معروف إن الجزمة أو الشبشب المقلوب بيجلب سوء الحظ.
هل المشي تحت سلم علامة على حسن الحظ ولا سوء الحظ؟
في ثقافات كتيرة بيعتقد الناس إن المشي تحت سلم خشب بيجيب سوء الحظ. فكر فيها، لو نجار شغال من فوق سلم خشب وانت عديت من تحته هل دا مش هيكون شيء خطير؟ فهل الخرافة دي ما هي إلا نصيحة منطقية؟ كنت أحب إن الإجابة تبقى آه بس من الواضح إن فيه تفسير غير منطقي أعمق للمعتقد دا.
لما السلم بيتسند على الحيطة بيكون شكل مثلث، ولأن مسيحيين كتير بيعتقدوا في فكرة الثالوث -أو وجود تلات أشخاص بيمثلوا الرب وهما الآب والابن والروح القدس- فشكل المثلث كان بيبقى مقدس إلى حدٍ ما عندهم لأهمية الرقم 3.
المشي تحت سلم خشب كان بيعتبر زي المشي جوا المثلث المقدس دا وبالتالي كسر قدسية الثالوث، واللي طبعًا كان بيتشاف على إنه خطيئة كبيرة لا تغتفر وإنه من عمل الشيطان. زمان كانت الاتهامات دي ممكن توصلك لإنك تتحاكم وممكن تتشنق بتهمة السحر.
وعلى الجانب الآخر من العالم فإن العرب بيعتبروا نفس الفعل بيجذب حسن الحظ! في مصر القديمة كان الناس بيحطوا سلم في المقابر مع دفن أي ميت علشان يساعدوا روح الميت إنها تطلع الجنة. وللسبب دا اتبنت الأهرامات التلاتة على شكل هرمي سُلّمي؛ علشان أرواح الفراعنة تقدر تلاقي طريقها بسهولة للجنة ويستمتعوا بحياة ما بعد الموت.
دلق القهوة
بالرغم من كون دلق القهوة في العادي حدث سيء ممكن يسبب حروق أو بقع وعلامات في الجسم يصعب إزالتها، إلا إنها بتعتبر علامة على حسن الطالع والبركة اللي بتحل على الشخص اللي بيدلقها وكمان المكان اللي اتدلقت فيه!
فلو بتزور حد في أي دولة من دول الشرق الأوسط، متخافش إنك توقع قهوتك بالغلط، لأن هتلاقي الناس فرحانين وبيحتفلوا.
النظر في مراية مكسورة
كسر أي مراية بيتقال إنه بيسببلك سوء حظ لمدة 7 سنين، بس اوعى تحاول تبص على انعكاس صورتك في المراية المكسورة دي أبدًا! الخرافة بتقول إن النظر لصورتك المشوهة في المراية بيعني إن النهاية قريبة.
الانعكاسات هي صورة الشخص نفسه، فمنطقي جدًا -كتغيير- إن رؤية صورتك وهي مكسورة في المراية بتعني إن انت أو حد من عيلتك هيموت قريب.
فتح شمسية داخل البيت أو المبنى اللي انت قاعد فيه
هو في الحقيقة احنا مبنستخدمهمش كتير كده كده، بس في حالة إنك استخدمتها، اتأكد إنك متفتحهاش غير لما تطلع من الباب وتبقى في الشارع وإلا سوء الحظ هيلازمك!
الشمسية في مصر القديمة كانت بتستخدم للحماية من أشعة الشمس، وبالتالي فتح الشمسية جوا المبنى كان بيعتبر استهزاء بإله الشمس اللي بطبيعة الحال كان هيخلي غضبه يحل عليك.
التصفير أو استخدام الصفارة بالليل
قبل ما تجامل بنت جميلة معدية في الشارع بصفارتك العالية، اتأكد إن الدنيا مش ليل! بيُقال إن التصفير هو طريقة لجذب الأرواح الشريرة اللي بتكون في المحيط بتتجول في أثناء الليل منتظرة ضحيتها القادمة.
الملح
لو دلقت شوية ملح، خد شوية بسرعة وحطهم على كتفك!
سواء بسبب إن الملح ليه قدسية وبيستخدم في تحضير المياه المقدسة أو بس عشان الملح كان سلعة مهمة جدًا في العصور القديمة، دلق الملح كان ولازال فال وحش.
وعشان تعكس اللعنة وتتخلص من سوء الحظ لازم تحط شوية منه على كتفك. المعتقد دا بترجع أصوله لقبل حتى العصور المظلمة، الملح كان بيتم رشه على كتف الناس الأيسر عشان دا الجانب الشرير وبالتالي ربط الروح الشريرة اللي بتلاحقهم.
عضة الجواز
عايز شوية حظ في يوم فرحك؟ خلي كل الناس تعض العروسة قبل الفرح. بيُعتقد إن العضة دي بتبعد التعويذات أو اللعنات والنظرات الشريرة وبتحيطك بالبركة وتجذب حسن الطالع. لو عايز تعرف هتتجوز امتى، ” https://www.psychicguild.com/” target=”_blank” rel=”noopener noreferrer ” هيساعدك تقرأ مستقبلك وتعرف عنه أكتر.
البومة
يمكن طائر البومة بيعتبر علامة على الحكمة في الغرب أو حتى بيستخدم الناس شكله كموضة في اكسسواراتهم، بس العرب مش بيشاركوهم نفس المنظور! البومة بتعتبر فال وحش لمجرد رؤيتها، ولو صفرت كمان فانت حظك هيكون في منتهى السوء.
الرومان القدماء كانوا بيربطوا ما بين البومة وقوى الشر بسبب طبيعتها الليلية. هما كمان كانوا بيعتقدوا إن صفير البومة بيُنبئ بالموت، وإن الفال دا هو اللي سبق وفاة يوليوس قيصر، أوجوستوس قيصر وحتى الجنرال الروماني أجريبا.
الايدين المثيرة للحكة أو الهرش
لو إيدك بتاكلك اوعى تهرش فيها! فمعنى إن راحة إيدك اليمين بتهرّشك هو إن فيه فلوس كتير جيالك في الطريق، ولو هرَشت، الفلوس دي كلها هتروح.
ولو نفس الكلام حصلك بس في إيدك الشمال، فدا بيعني العكس تمامًا؛ إنك داخل على ضائقة مالية كبيرة.
طب لو عايز تهرش في إيديك الاتنين؟ دا معناه إن في يوم سعيد، منتج ومليء بحسن الحظ مستنيك.
خنفساء في بيتك؟
رؤية الحشرات ممكن يكون ساعات غريب شوية، بس متخافش لو لقيت خنفساء بتحوم حوالين بيتك. العرب بيعتقدوا إن دي علامة على إن فيه ضيوف جايينلك، ولأننا شعوب بتعز كرم الضيافة، مين مش هيحب دا؟
القطط
بالرغم من إن القطط السودا بيتبصلها دايمًا على إنها فال وحش أو إنها الشيطان بنفسه بس متخفي، إلا إن المصريين في العصور القديمة كانوا بيقدسوهم بل كانوا بيعدموا أي شخص بيقتلهم.
الناس كانوا بعتقدوا إنك لما تمر على قط أو قطة سودا فدا علامة على إن الشيطان بيراقبك، ولحد النهاردة لسه الناس بتخاف من إن القطط السودا اللي مربينها في البيت ممكن تقتلهم وهما نايمين، وعشان كده بيطلعوا القطط دي من أوض النوم بالليل.
الرجل اليمين ولا الشمال؟
اختار الرجل اللي هتدخل بيها كويس! بيتخيل العرب إن دخول الأماكن الجديدة والبيوت بالرجل اليمين بيجيب حسن الحظ والبركة على البيت، بينما الحمام لازم ندخله برجلنا الشمال وإلا حاجات مش كويسة هتحصلك جوا.
“خش برجلك اليمين”