في 31 أكتوبر كل سنة، عدد من الدول الأجنبية بتحتفل بعيد الهالوين، أو عيد الهلع زي ما احنا بنسميه، ومؤخرًا الناس في الدول العربية كمان بتحتفل به، من باب الاحتفال والبهجة اللي بقينا بندور عليها في أي حدث.
والسنة دي السعودية أخدت النصيب الأكبر من الاحتفالات بشكل مميز ومختلف، والصور انتشرت من شوارع الرياض والناس لابسين لبس مرعب مخصوص وميك أب شخصيات تنكرية مرعبة، ومعظمهم من أفلام رعب زي مصاصين الدماء أو الأشباح والزومبيز.
رئيس الهيئة العامة للترفيه والمستشار بالديوان الملكي السعودي، تركي آل شيخ، أشاد باحتفالات الهالوين السنة دي في السعودية، وكتب على فيسبوك: “الأجواء فوق الخيال في ويك إند الرعب” اللي بيحتفل به السعوديين من الخميس 27 أكتوبر للسبت 29 أكتوبر.
الأجواء فوووق الخيااال في #ويكند_الرعب 😍
اللي ما جاء اليوم يجهز الزي التنكري ويجي بكرة 😉
#موسم_الرياضPosted by تركي آل الشيخ – Turki Al Alshikh on Thursday, October 27, 2022
احتفالات السعودية بالهالوين كانت متركزة في فعاليات موسم الرياض، و”بوليفارد رياض سيتي” اللي تعتبر واحدة من أهم مناطق إقامة فعاليات موسم الرياض، الاحتفال فيها كان كبير، وقالوا في حسابهم على تويتر: “أزياء تنكرية مرعبة، تختلف معها معايير الخوف عندك في ويك إند الرعب”.
الهالوين فرصة لكل اللي بيحبوا أفلام الرعب والمقالب والتنكر في كل أنحاء العالم، علشان يظهروا مهاراتهم في التنكر والرعب، بتجيلهم الفرصة يعيشوا في فيلم من أفلام الرعب اللي بيحبوا يتفرجوا عليها، والهالوين في السعودية كان إضافة جديدة لموسم الرياض، اللي بتختلف فعالياته بين حفلات ومسرحيات وألعاب وأشكال مختلفة من الترفيه.