أفلام رعب مصرية: ازاي بتتناول فكرة الرعب بالنسبة للمصريين، وأفلام ماينفعش تفوتها

غير المنتشر عن أفلام الرعب العربي بإنها مابتخوفش ومضحكة وكل اللي بيتقال عنها ده، لكن بشكل أو بآخر، الفكرة دي ظلمت أفلام اتعملت بشكل مختلف في وقت ماكانش متاح فيه إمكانيات متطورة، واتعملت بأفكار سابقة عصرها، زيّ فكرة التحالف مع إبليس، واتعملت في أفلام أبيض وأسود في وقت كان فيه الأفلام العربية في قمة مجدها. ولو جينا نفكر في الفرق بين الأفلام العربية والأفلام الأجنبية في الرعب، ممكن تحس إن المقارنة تضحك، بس لو فكرت بشكل مختلف، هتلاقي إن مفهوم الرعب نفسه بيختلف على حسب طبيعة الشخص وثقافته وظروفه، بمعنى، كمصريين أو عرب، من أكتر الحاجات اللي بتمثل الرعب بالنسبة لنا هي عالم الجن أو التعاويذ والسحر وكل ما هو غير مرئي بالنسبة لنا في العالم ده، علشان كده أغلب أفلام الرعب العربية بتتناول الفكرة دي بأشكال مختلفة، لكن جو الفامبايرز والكلام ده مابياكلش معانا، ومن وجهة نظر تانية، ممكن تبقى شايف إن الأفلام الرعب العربي دي للي قلبهم خفيف، وسواء كان ده أو ده، في أفلام ماينفعش تفوتها.

موعد مع إبليس

الفيلم ده بيناقش فكرة الإنسان اللي بيتحالف مع الشيطان علشان يحقق مكاسب دنيوية زيّ الشهرة والفلوس، وبعدها بيكتشف البطل إن حياته اتحولت لجحيم بسبب الشيطان، ويرجع الصراع الأزلي بين الإنسان والشيطان، الفيلم بطولة زكي رستم ومحمود المليجي، والفكرة دي اكتشفنا إنها اتناقشت في الفيلم من سنين طويلة، قبل ما تكون في أفلام أجنبية مختلفة بإمكانيات متطورة.

عاد لينتقم

والفيلم ده منتشر عنه دلوقتي قصة مش معروف صحتها لكنها مشوقة، وهي إن الفيلم اتقالت فيه تعويذة حقيقية من مشعوذ حقيقي مش ممثل، بدل ما تكون أي كلام، ويقال إن ده كان سبب لمنع عرض الفيلم واتغيرت النسخة لتغيير التعويذة اللي اتقالت، سواء القصة صح أو لأ، فده بيخلينا متشوقين نشوف الفيلم.

التعويذة

ماينفعش نبقى بنتكلم عن أفلام رعب مصري ومانجيبش سيرة أشهرهم، الفيلم بيعتمد على فكرة السحر والتعاويذ والرعب من عالم الجن، وبتدور أحداثه عن بيت بيسكن فيه الأبطال، وفي دجال عايز يشتري البيت لكن صاحب البيت اللي بيقوم بدوره محمود ياسين مش موافق على البيع، فبيبتدوا الأبطال يواجهوا حاجات خارقة للطبيعة بتحصل في البيت نتيجة سحر بيعمله الدجال علشان يخليهم يسيبوا البيت.

الإنس والجن

يعتبر من أشهر الأفلام المصرية للرعب، بطولة عادل إمام ويسرا، بتدور قصته عن حب بين جن وإنسانة، ودي كانت طريقة تناول مختلفة في عالم الرعب في الأفلام المصرية، وبيمثل صراع بين العالمين.

122

أول فيلم رعب مصري بتقنية 4D، وقصته بتجمع بين الرعب والإطار الاجتماعي، بقصة حب بين شاب من طبقة شعبية وبنت من الصم والبكم، بيدخلوا لعالم العمليات المشبوهة، وبيتعرضوا لحادثة يتنقلوا بسببها للمستشفى، وهناك بيواجهوا أحداث مفزعة. الفيلم بطولة أحمد داوود وأمينة خليل ومحمد ممدوح وأحمد الفيشاوي.

الفيل الأزرق

عن: صوت العرب

يعتبر من أحسن الأفلام المصرية للرعب من حيث جودة القصة والصورة، ومن ناحية الجماهيرية والإيرادات، الفيلم من رواية لأحمد مراد، وهو اللي كتب الفيلم كمان بنفسه، وبتدور قصته عن طبيب نفسي بيحاول يساعد زميله اللي ارتكب جريمة نتيجة إنه كان مسيطر عليه جن. الفيلم بطولة كريم عبدالعزيز وخالد الصاوي ونيللي كريم.

آخر كلمة: ماتفوتوش قراءة: 10 أفلام مصرية مستنيينهم في 2021

تعليقات
Loading...