حالة من الحزن سيطرت على مواقع التواصل الاجتماعي، بعد انتشار رسالة أخيرة لأم مصرية عمرها 39 سنة، كانت بتصارع مرض السرطان حتى وفاتها.
أوصت الأم نيرمين محمد، خلال البوست على موقع التواصل الاجتماعي، بعض الوصايا الأخيرة لها، فكتبت لأهلها ولجيرانها وأصحابها أمنياتها الأخيرة لها ولولادها: “وصيتي لكم لما تسمعوا خبر وفاتي تحضروا دفنتي، بلغوا بعض، نفسي يبقى على قبري ناس كتير واقفين يدعولي، ويقرؤوا قرآن وماتمشوش وتسيبوني خليكم معايا شوية ساعة أو اتنين أتونس بكم، اسألوا على ولادى من وقت للتاني وخلوا بالكم منهم وبالذات زياد عشان متعلق بيا أوي، اللي زعلته يا ريت يسامحني ادعولي كل ما أجي على بالكم، وخلو ولادي دايمًا في بالكم”.
نيرمين كانت بتحارب السرطان لسنين طويلة، وكانت دايمًا بتشارك أوجاعها مع المرض ورحلتها مع العلاج الكيماوي على صفحتها على الفيس بوك، الأمر اللي اتسبب في حالة من الحزن للناس اللي كانت حريصة على متابعتها ودعمها بشكل يومي، وحضر المئات جنازتها في محافظة المنوفية.