مهرجان قلعة صلاح الدين الأيوبي: بـ20 جنيه هتحضر حفلات لأكبر الفنانين

مهرجان القلعة هو واحد من أهم المهرجانات الموسيقية اللي بتتعمل في مصر وفي العالم العربي كله، وبيُقام في قلعة صلاح الدين الأيوبي، اللي اتبنى حواليها حي من أهم أحياء القاهرة القديمة واللي اتسمى على اسمها “حي القلعة”. المهرجان العريق بينطلق الساعة 8 بليل يوم الأحد 14 أغسطس في دورته الـ 30، وبيستمر ولأول مرة في تاريخة لمدة 18 يوم كاملة لحد يوم الأربع 31 أغسطس.

عن: mediaaws

بينظم المهرجان دار الأوبرا المصرية برئاسة الدكتور مجدي صابر، وبيشرف عليه الدكتور خالد داغر، رئيس البيت الفني للموسيقى والأوبرا والباليه، وبيقام بالتعاون مع وزارة السياحة والآثار.

سعر تذكرة المهرجان، اللي بيستضيف كوكبة من أهم نجوم الموسيقى العربية، 20 جنيه بس. وفي السياق ده بتقول وزيرة الثقافة المصرية، إيناس عبدالدايم، إن المهرجان هدفه هو تحقيق العدالة الثقافية من خلال منح الطبقات البسيطة من المصريين الفرصة لحضور حفلات موسيقية بسعر رمزي.

زيّ ما هو واضح من جدول حفلات المهرجان؛ بيشارك فيه نجوم كُبار زيّ مدحت صالح، وهاني شاكر، وعلي الحجار، وفايا يونان، ولينا شاميميان، ودينا الوديدي، ومحمد محسن، وفرق مهمة زيّ وسط البلد، ومسار إجباري، وكمان الشيخ ياسين التهامي، والموسيقار العظيم عمر خيرت.

المهرجان بيضم كوكبة متنوعة ومختلفة من صناع الموسيقى العربية، وتقدر تلاقي ذوقك في الحفلات دي مهما كان، بس علشان تروح أي حفلة من حفلات المهرجان، في حاجات لازم تعرفها من الأول وتحضر لها علشان تقدر تنبسط هناك.

ازاي تروح مهرجان قلعة صلاح الدين الأيوبي وتوصل لمكان الحفلات؟

عن: snd

أقرب مكان للقلعة هو ميدان السيدة عائشة، فممكن تركب للميدان وتسأل هناك على اتجاه القلعة، وهي كلها 10 دقايق مشي من الميدان. أما لو عايز تروح مترو، فـأقرب محطة مترو هي الملك الصالح، ومن هناك تركب ميكروباص السيدة عائشة وهتوصل في حوالي ربع ساعة.

وهتلاقي في ميدان رمسيس في وسط البلد ميكروباصات بتطلع ميدان السيدة عائشة وبياخد حوالي نص ساعة أو أقل، وهتلاقي الميكروباصات دي جتب جامع الفتح في ميدان رمسيس.

أول ما توصل للقلعة هتتمشى لحد البوابة فوق وتقطع تذكرة بـ 20 جنية، ودي تذكرتك للقلعة بحفلاتها وحبشتكاناتها كلها، هتدخل جوا وتسأل قاعة الحفلات فين هتلاقي ألف مين يدلك، وممكن تركب باص صغير من البوابة لحد المسرح جوا ببلاش.

تروح القلعة امتى علشان تحضر حفلة؟

ادرس الأول الجدول اللي فوق ده كويس وشوف أنت عايز تروح أنهي حفلات فيهم، وروح بدري، أهم حاجة إنك تروح بدري على قد ما تقدر علشان بتبقى الدنيا زحمة جدًا، ولو عايز تاخد كرسي في الصفوف الأولى في ناس كتير بتروح حفلات الفقرة الأولى وتفضل قاعدة لحد الفقرة التانية علشان تحافظ على أماكنها، اعمل زيهم.

تاخد إيه معاك وأنت رايح حفلات القلعة؟

عن: soutalomma

أول فقرة في الحفلات بتبدأ الساعة 8 بليل والفقرة التانية بتبدأ الساعة 10، وعلشان كده مش محتاج تقلق من الشمس. بس لو هتقعد الفقرتين، خد معاك حاجة تاكلها، اعمل سندوتشات وخد مياه وشيبسي وبسكوت وحاجات، علشان ماتتحركش كتير من مكانك وتتخانق مع الناس اللي بتيجي تاخد الكراسي وضع يد.

حاول تروح مع صحابك، اتنين على الأقل علشان تحاربوا جريمة وضع اليد اللي بتحصل هناك، فلو هتسيب مكانك خلي حد يقعد يحجز كراسيكم.

هتصور ستوريز كتير، وجو المسرح بيبقى تحفة بالإضاءة الجميلة، وشكل الحجارة القديمة هيخليك عايز تتصور هناك كتير، فعلشان تليفونك ما يفصلش شحن وتتضايق هناك اشحن تليفونك كويس، ولو تقدر تاخد معاك باور بنك هيبقى جامد أوي.

بس يا سيدي ده كل حاجة محتاج تعرفها عن المهرجان، وخد صحابك وروحوا انبسطوا واحضروا حفلات على قد ما تقدروا لكل الناس اللي بتحبوهم، وخد بالك كل حفلة ساعتين يعني هتسمعوا مزيكا كتير أوي.

أخر كلمة: ماتفوتوش قراءة: فن الشارع: مهرجان جدار ولمسة تشكيلية في شوارع الرباط

تعليقات
Loading...