رغم إن كل التركيز والاهتمام بيكون عن المسلسلات في الموسم الرمضاني، لكن في ناس مش من محبي الدراما، أو ناس مش من محبي متابعة الدراما في رمضان وبتحب تستنى تتفرج عليها بعد رمضان خالص، طب الناس دي نرشحلها إيه؟ ولا هننساها ونتكلم عن المسلسلات بس طول الشهر؟ قررنا نشاركهم بقائمة من البرامج اللي بتقدم محتوى مختلف علشان يقدروا يلاقوا اهتماماتهم أيًا كانت.
رميم
على مدار سنين والداعية مصطفى حسني له محبين كتير في الوطن العربي، بيستنوا المحتوى اللي بيقدمه في رمضان ببرامج كل سنة بتناقش مواضيع دينية ودنيوية بشكل سهل وجميل، والسنة دي مصطفى حسني هيكون على قناة (أون) في برنامج (رميم) اللي هيناقش فكرة مرور الإنسان بمواقف صعبة تساهم في بناء شخصيته، كمان بيهدف لترميم الروح من كل المحاور، سواء علاقة الإنسان بذاته أو دينه أو مجتمعه.
البرنامج هيتذاع كل يوم الساعة 5:30 المغرب على قناة (أون).
4 شارع شريف
محتوى مختلف في برنامج واحد، من مناقشة مواضيع مختلفة باستضافة خبراء، لفقرات عن الموضة، لمناقشات فنية، وحتى الطبخ. شريف مدكور بيقدم محتوى مختلف ومناسب لاهتمامات كتير في برنامجه 4 شارع شريف على قناة الحياة، كل يوم الساعة 3:30 العصر، وميعاده مناسب لفترة زهق العصر دي.. عارفها؟
حبر سري
لو أنت من محبي متابعة الفنانين والنجوم في لقاءات تليفزيونية خصوصًا في رمضان، وبتحب تعرف تفاصيل أكتر عن أعمالهم وعن كواليس حياتهم الفنية وكمان علاقاتهم بالفنانين، يبقى (حبر سري) هيكون وجهتك المفضلة في رمضان مع الإعلامية أسما إبراهيم.
البرنامج بيتذاع على قناة القاهرة والناس كل يوم في رمضان الساعة 10 مساء، والمحتوى بيهتم باستضافة نجوم من الساحة الفنية وكمان المجال الرياضي، فلو أنت بتحب تشوف نجومك المفضلين برا سياق الدراما، اتفرج عليهم في البرنامج.
وهيكون من أبرز النجوم اللي هنشوفهم في البرنامج في رمضان السنة دي نيللي كريم، عصام الحضري، مي عمر ورانيا يوسف.
رجال صدقوا
برنامج جديد في رمضان، هيتحاور فيه الإعلامي أحمد الدريني مع الدكتور أسامة الأزهري في مناقشات مختلفة، هيستعرضوا فيها إبحار يومي مع علماء جم من مختلف قارات العالم لمصر للدراسة في الأزهر الشريف.
وعلى مدار 30 حلقة، البرنامج هيقدم نماذج من شخصيات تأثرت بدراستها داخل أروقة الأزهر الشريف، ورجعوا مرة تانية لبلادهم، فنقلوا اللي اتعلموه لها، ومنهم اللي رجع وأصبح رئيس لبلاده، ومنهم اللي أسس مدارس علمية، ومنهم اللي واجه الاستعمار في وطنه وخدم بلاده.
أنا والقناع
في نوعية من البرامج اللي النجوم بيفتحوا فيها قلبهم وييتكلموا عن تفاصيل كتير، سواء في حياتهم الشخصية أو الفنية، وبتكون فرصة للجمهور يعرفهم عن قرب، خصوصًا لو البرنامج قدر يستضيف نجم قليل الظهور الإعلامي، فالناس بتكون متحمسة تشوفه بيتكلم وتعرف عنه أكتر.
برنامج أنا والقناع هيكون من نوعية البرامج دي في شهر رمضان، وشوفنا من ساعات قليلة حلقة الفنانة غادة عادل، اللي تصريحاتها انتشرت منه بشكل واسع وكبير.
البرنامج بيتعرض على قناة (سي بي سي) مع المذيعة منى عبدالوهاب الساعة 10 مساء.
حكاوي القهاوي
برنامج #حكاوي_القهاوي يعود إليكم من جديد ولكن هذه المرة على شاشة #قناة_الحياة😍
الناس حكايات متعاشة❤️ هنشوفهم سوا على الشاشة📺
برنامج #حكاوي_القهاوي يعود إليكم من جديد ولكن هذه المرة على شاشة #قناة_الحياة😍
مع الإعلامية رشا الجمال
#رمضان_يقربنا🌙Posted by Alhayah TV on Thursday, March 31, 2022
رشا الجمال بتعيد الحياة لبرنامج والدتها -الإعلامية سامية الأتربي- اللي أخد مكانة كبيرة في قلوب المصريين على مدار سنين في شهر رمضان، (حكاوي القهاوي) هيتذاع السنة دي على قناة الحياة كل يوم الساعة 5:30 المغرب. فرصة تسمع في حكايات مختلفة ومسلية.
في وقت ما قبل المغرب اللي غالبًا بنكون زهقانين فيه، (حكاوي القهاوي) هيكون حل.
قل لنا إيه البرامج اللي ناوي تتابعها في شهر رمضان السنة دي؟