من إعلاناتها: مسلسلات متحمسين نشوفها في رمضان

كمان كام ساعة، هنبقى على معاد مع مسلسلات رمضان اللي الناس بتستناها من السنة للسنة، والسنة دي هنشوف نجوم كتير، منهم اللي بقالنا فترة ماشوفناهوش في الدراما. وبما إن إعلانات المسلسلات خلاص نزلت، حبينا نشارككم بأكتر إعلانات تشويقية عجبتنا وخلتنا متحمسين نشوف المسلسل نفسه.

تحت الوصاية

منى زكي راجعة للدراما بقوة، خصوصًا بعد نجاح (لعبة نيوتن)، مستنيين منها دراما تتفوق فيها على نفسها زي ما وصفها الجمهور. ومن إعلان مسلسلها السنة دي (تحت الوصاية) احنا فعلًا قدام دراما قوية بتناقش قضية مجتمعية مهمة، مستنيين نشوف تفاصيلها.

جعفر العمدة

بتغيير عن اللي متعودين عليه، محمد رمضان بيقدم مسلسل (جعفر العمدة) السنة دي، واللي الظاهر من إعلانه إن قصته مختلفة مستنيين نعرفها بالتفصيل. بس كالعادة متحمسين نشوف أكشن ودراما وجدعنة من محمد رمضان.

الهرشة السابعة

بتكرار تجربة معظم فريق عمل (خلي بالك من زيزي) اللي حقق نجاح كبير جدًا، هنشوف السنة دي (الهرشة السابعة) بقصة وتفاصيل متحمسين نعرفها من نجوم واثقين في الكومبو اللي مجمعهم، علشان شوفنا نجاحهم مع بعض قبل كده. متحمسين لإيقاع (الهرشة السابعة).

سوق الكانتو

ناس كتير متوقعة إن (سوق الكانتو) هو النسخة العربية من (بيكي بلايندرز)، علشان الحقبة الزمنية والملابس والديكور، لكن تفتكروا فريق العمل هيفاجئنا بإيه في قصة المسلسل؟ اللي بيدور في زمن الناس بتحب تشوفه في الدراما وبتنجذب لمعظم مسلسلات الزمن الجميل.

الكتيبة 101

من ملاحم أبطالنا، هنشوف عمرو يوسف وآسر ياسين في ملحمة جديدة لأول مرة تخرج للنور في عمل درامي، بعد ما الجمهور اتعود يشوف كل سنة ملحمة حربية حصلت بالفعل لجنودنا في أنحاء مختلفة من الوطن. تفتكروا المسلسل هيكون بنفس قوة الأعمال الملحمية اللي فاتت؟ احنا متوقعين كده.

قولوا لنا متحمسين تشوفوا مسلسلات إيه وتتابعوا مين من النجوم السنة دي؟

آخر كلمة: ماتفوتوش قراءة: الجواب بيبان من عنوانه؟ ثنائيات ومسلسلات متوقعينها في رمضان

تعليقات
Loading...