هتعيشك حالة روحانية مختلفة: أشهر مساجد لصلاة التراويح في رمضان

واحدة من أهم الطقوس في رمضان هي زيارة المساجد والمواظبة على قراءة القرآن وصلاة التراويح، وصلاة التراويح بالذات من أهم الطقوس اللي بتحسسك بأجواء رمضان، بتعمل لك حالة من الروحانيات غريبة ومختلفة بتساعد القلب على الاطمئنان، الناس بتستناها علشان تصلي وتدعي باللي نفسها فيه.. وفي اللي بيفضل إنه يصليها في البيت، وفي اللي بيحب يصليها في المساجد مع آلاف الناس في الشارع وعلى صوت الشيوخ ووسط الزينة.. وعلشان كده جبنا لهم أشهر مساجد معروفة بإقامتها لصلاة التراويح في وسط أجواء روحانية ودينية.

عمرو بن العاص

عن:memphis

واحد من أجمل المساجد اللي ممكن تصلي فيها صلاة التراويح وأشهرها، مساحته كبيرة جدًا بيشيل آلاف من المصلين، بجانب ده، بناؤه المعماري بيجمع ما بين الروحانية والجمال، بداية من المدخل الرئيسي للتفاصيل اللي جوا بيدخلك في حالة روحانية مختلفة.

المسجد موجود في مدينة الفسطاط في مصر القديمة، فلو أنت ساكن بعيد هتحتاج تروح تحجز مكانك قبل الصلاة بشوية، والعنوان بالتفصيل والاتجاهات من هنا.

الحصري

عن:master

مش بيعتبر من المساجد الكبيرة أوي، بس أجوائه بتبقى حلوة، لو أنت من سكان أكتوبر والحي السابع فهيبقى أفضل خيار، بجانب إنه ملحق به جمعية خدمات خيرية هتسهل لك التبرع لو حابب تقدم تبرعك في مكان موثوق، والعنوان بالتفصيل من هنا.

مسجد السيدة نفسية

موجود في منطقة مصر القديمة، من أعرق المساجد في القاهرة، هتلاقي فيه مقام السيدة نفيسة بنت الحسن، وهي من أهل بيت رسول الله عليه الصلاة والسلام، وميزته كمان إنه موجود في منطقة شعبية، يعني تقدر بعد ما تخلص صلاة تخرج وتتسحر في قهوة من القهاوي اللي موجودة، وتتفرج على محلات الفوانيس والناس اللي بتعمل كنافة، والعنوان من هنا.

مسجد الإمام الحسين

من أعرق المساجد في القاهرة والعالم الإسلامي من أيام العصر الفاطمي، وميزته إن منطقة خان الخليلي جنبه، يعني المزارات السياحية والقهاوي والقعدات والأجواء الرمضانية، وبيتقال إن في أصوات للعصافير ساكنة جوا المسجد، ودي أكتر حاجة بتميزه، بجانب التواشيح والابتهالات وحلقات الذكر اللي بتتعمل فيه، وتقدر تروحه من هنا.

جامع الأزهر

واحد من أعرق الجوامع في القاهرة الكبرى، بيصلي فيه ناس من كل الجنسيات، واللي بيميزه كمان كونه موجود في قلب منطقة تاريخية، بجانب ده، فهو بيقدم أنشطة وفطار جماعي ودروس دينية وتحفيظ قرآن وتعليم أحكام التجويد وشرح كتب الفقه والتفسير والحديث، وتقدر تروحه من هنا.

بجانب المساجد اللي موجودة في القاهرة، في كمان مسجد العتيق أو البرج الجديد، في برج العرب في الإسكندرية، وبالتحديد موجود جنب استراحات مطار برج العرب. ومسجد القائد إبراهيم، في منطقة محطة الرمل. ومسجد الرضوان، في عزبة إبراهيم صالح العامرية.

وفي محافظة بورسعيد، عندك مسجد أبو الدحداح في الحرية، ومسجد النشار والشاطئ. وفي محافظة المنصورة، مسجد النصر ومسجد الصديق. وفي المنوفية في مسجد العباسي وسيدي شبل.

آخر كلمة: ماتفوتوش قراءة: بخطوات بسيطة: ازاي نعمل كتاب لحفظ الذكريات؟

تعليقات
Loading...