بخطوات بسيطة: ازاي نعمل كتاب لحفظ الذكريات؟

مين مننا مش بيحب الذكريات ويحب يفتكرها؟ خصوصًا لو كانت حلوة، لإنك لما تفتكرها بتساعد على فرز هرمونات السعادة، ودلوقتي أي حد بيحاول بأي طريقة يحتفظ بذكرياته، لدرجة إن التطبيقات بقت تساعدنا على ده وتحفظ في ذاكرتها الصور والحالات والبوستات اللي نزلتها، وتيجي تفكرك بها بعد سنين، علشان عارفة ده ممكن يبقى تأثيره إيه على الشخص.

ولإن الذكريات ماينفعش تتركن على الرف، النهارده هنقولكم بخطوات بسيطة للمبتدئين، ازاي تعملوا كتاب للذكريات تجمعوا فيه لحظاتكم الحلوة وصوركم مع الناس اللي بتحبوها.

هتعمله لمين؟

عن:juila

حدد الأول أنت بتعمله لمين وعلشان إيه، ذكريات لشريكك، عن العيلة، عن الصحاب، هتجيبه لطفل لسه مولود، علشان ده هيساعدك في تحديد الخامات اللي محتاجها والألوان والصور اللي هتختارها.

وبعد ما تحدد أنت هتعمله عن إيه، اعمل قائمة اكتب فيها القصص والأحداث اللي هتضيفها في ألبومك وابتدي خطط، اكتب عنوان لكل صفحة أو موجز صغير، وسواء هتعملها بترتيب زمني معين ولا هتعمل كام صفحة، خطط أنت عايز شكل الألبوم من جوا يبقى عامل ازاي، ابدأ في تحضير الصور اللي هتحطها في الألبوم، وقسمهم كل قصة لوحدها.

هتجيب إيه؟

بعد مرحلة التخطيط، اللي المفروض تكون اخترت فيها الصور اللي هتضيفها وعملت الهيكل بتاعك وبناءً عليه هتبدأ تختار الخامات والأدوات.

في حاجات أساسية لازم تشتريها علشان تبدأ تنفذ، زينة تحطها على الورق، زي استيكر مثلًا على شكل طوابع بريدية، وورق كانسون أو ورق مقوى، وقلم حبر علشان تكتب به، بس يكون مقاوم للمياه والبهتان، وتجيب منه كذا لون، ومواد لاصقة زي الصمغ، ومقص، أو ممكن تجيب قوالب مقصوصة جاهزة من الورق الملون اللي هتجيبه، وممكن تجيب ورق كرافت تقطعه بشكل عشوائي، ولو حابب تكتب عليه بيبقى شكله لذيذ، وخيط من الجوت الطبيعي، وطبعًا كل دي زيادات للشكل الجمال ومش ضرورية.

مرحلة اختيار الألبوم

عن:pintrest

نيجي بقى لمرحلة اختيار الألبوم اللي هتضيف فيه كل الكلام ده، وده لازم ييجي بعد ما تكون خططت كل الحاجات اللي هتضيفها، علشان تقدر تختار حجم الألبوم المناسب لك، لكن الحجم المثالي هو 12× 12 بوصة، علشان هو أكتر حجم هتعرف تحط فيه الزخارف أو الحاجات التذكارية مع الصور.

ولو مساحته 8 × 11، هتقدر تضيف فيه مثلًا صورتين في كل صفحة، والأصغر 8×8 ده لو لحاجة محددة أوي هتعملها، ومش بيكفي غير صورة واحدة.

التجربة

قبل ما تبدأ في مرحلة التفيذ الفعلي، ممكن تقطع صفحة أو اتنين من الكتاب تجرب فيهم برا وتشوف الشكل النهائي على الورق هيبقى عامل ازاي، وصمم صفحتك وشوف هتحط إيه في الأماكن المختلفة وهتكتب إيه، وحدد المساحة المخصصة المناسبة، علشان تتجنب إنك تهدر المواد وتقص غلط أو على الفاضي.

نيجي للتنفيذ

عن:vitge

بعد ما اتأكدت من الشكل اللي أنت عايزه، ولو عايز حجم معين للصورة تقدر تحدد الجزء اللي عايز تقصه من ورا الصورة بالقلم الرصاص، ولو عايز تبرز شيء معين تقدر تبروزه بالزينة أو الشرايط الملونة اللي اشترتها وتعمل لها إطار بسيط وتلزقه بالصمغ، وفي كمان صمغ 3D بيرز العنصر اللي أنت ضيفته.

ابدأ صيغ عنوان لكل صفحة علشان الموضوع مايبقاش مبهم، ممكن بكلمة بسيطة أو اسم الشخص أو تاريخ الذكرى، ولتجنب الأخطاء، تقدر تطبع كتابتك وتلزقها على طول.

أهم من الشغل.. تظبيط الشغل

بعد ما تخلص كل صفحة، احميها عن بواقي بلاستيكي شفاف، تقدر تشريته من أي مكتبة بأحجام متنوعة، علشان يحميها من الغبار أو بصمات الصباع، وده طبعًا بعد ما كل الصفحات تنشف.

دي الخطوات الأساسية اللي لازم تعرفها علشان تعمل كتاب الذكريات، ولو عايز تعرف ازاي تاخد أفكار لتصميم كل صفحة وتستخدم الأدوات بشكل صح وازاي تزينها، دي مجموعة من الفيديوهات اللي هتساعدك.

عمل الكتاب بإيدك، وتركيزك على التفاصيل والذكريات اللي هتحطها في الألبوم، والمجهود اللي هتبذله في كل صفحة، والكلام اللي هتختار إنك تكتبه، أهم من شكل الكتاب النهائي، ودي الهدية الحقيقة اللي هتقدمها للشخص العزيز عليك.

آخر كلمة: ماتفوتوش قراءة: ازاي تستغلي وقت لنفسك لما يبقوا الولاد في المدرسة؟

تعليقات
Loading...