بمناسبة الرجوع للمدارس، ما بتصدقي الولاد ينشغلوا في حاجة وترتاحي شوية وتاخدي وقت لنفسك، مش كرهًا في ولادك لا سمح الله، بس الإنسان برضه يحب شوية وقت لنفسه كده. وبما إن لحد سن المدرسة الولاد بيبقوا لازقين فيكي، ومُلزمين منك في كل حاجة من الألف إلى الياء، وحياتك بتبقى عبارة عنهم وبتنسي نفسك وسط مشاغلهم، عايزين نقترح عليكي شوية اقتراحات تخليكي تستغلي وقت وجود الولاد في المدرسة أحسن استغلال.
خلصي مشاويرك
طبعًا في حالة إنك مش بتعرفي تخلصي مشاويرك والولاد لازقين فيكي، استغلي الفرصة واعملي مشاويرك أيًا كان نوعها، سواء تنزلي تلفي في السوبر ماركت براحتك وتشتري حاجتك بروقان، أو تنزلي تفطري مع صاحباتك، أو كمان تروحي الكوافير من غير ما تبقي شايلة هم إنك هتتأخري على الولاد، أو لا قدر الله تضطري تاخديهم معاكي الكوافير، أي مشوار من أي نوع هيكون عندك الفرصة تعمليه وأنتي بالك مرتاح.
ماسكات وحركات
فرصة من دهب إنك تهتمي ببشرتك وشعرك، وتقعدي تعملي ماسكات براحتك، من غير ما تضطري تغسلي وشك بسرعة أو تنسي إن الماسك على وشك علشان اتلهيتي في الولاد. الوقت ده تقدري تعملي روتين جميل يشمل كل أنواع الدلع، وتاخدي أطول وأروق دوش في حياتك، من غير زن وتخبيط على الباب.
وعلشان تنجزي أكتر من حاجة في الوقت ده، هنقترح عليكي ماسكات سريعة وكمان نتيجتها ومفعولها بيبانوا على طول، وكمان مكوناتهم سهل تلاقيها في مطبخك علشان ماتاخديش وقت ومجهود.
ماسك العسل والزبادي
علشان العسل له خصائص مهدئة ومرطبة للبشرة، وبيحتوي على مضادات الأكسدة والليمون ومعروف بقدرته على شد البشرة والتخلص من الجلد الميت ده غير التفتيح والتنقية، وطريقته سهلة، بتحطي علبة زبادي وعليها معلقتين عسل نحل وتحطيهم 10 دقايق وبعدين اغسلي وشك بمياه فاترة.
ماسك القهوة
ماسكات ووصفات القهوة كتير، لكن الأسهل هو ماسك القهوة مع الحليب، حطيه على بشرتك ربع ساعة، وبعدها دلكي وشك لمدة دقيقتين واغسليه بمياه باردة، هتحسي إنه شال الجلد الميت وبيظهر بشرتك نضرة عن الأول.
الحقي نامي ساعتين
دي بديهيات! ممكن تاخدي حقك كإنسان طبيعي في نوم متواصل عميق جميل يروّق البال ويفوّق الجسم ويحل كل المشاكل كده. الكام ساعة اللي الولاد بيروحوا فيهم المدرسة مش شرط يكون في تارجت خطير تحققيه، عادي ممكن الإنجاز يبقى إنك نمتي كام ساعة من غير قلق في النص، ومن غير دوشة، ومن غير ما حد يصحيكي في عز النوم يقولك “ماما ده ضربني” “ماما عايز أشرب لبن العصفور دلوقتي” وكل ده.
اعملي فطار ملوكي
لو مش عايزة تنزلي من البيت ولا تفرهدي نفسك، ممكن تستغلي الفرصة في إنك تعملي لنفسك فطار باشاوات بكل روقان، وتقعدي تظبطيه على رواقة، اعملي عصير وساندوتش بتحبيه، هيبقى عندك وقت تهندمي الأكل والشرب من غير ما تبقي مستعجلة، وهتقدري تاكلي وتشربي بروقان من غير ما تحسي إن في حد بيجري وراكي، وتبطلي تقولي الجملة المعتادة بتاعة “نفسي أشرب نسكافيه من غير ما يبرد”.
بنقترح تتفرجي على وصفات للفطار من الشيف آية حبيب، والأجواء بتاعت الفديو والتصوير بتاعتها هتشجعك تعملي فطار رايق كده في ضوء الشمس زيها، ممكن تجربي الوصفة دي.
تتفرجي على التليفزيون من غير كارتون
طبعًا الولاد واخدين سُلطة ومسيطرين على التلفزيون لصالحهم، هما والكارتون وطيور الجنة وسبيس تون، دي فرصتك بقى تشغلي اللي أنتي تحبيه على التلفزيون وتتفرجي براحتك من غير زن، ومن غير “أنا عايز توم وجيري”، بس ممكن تتفرجي أنتي على توم وجيري بروقان بقى، وتحسسي نفسك إنك طفلة وغايبة يوم من المدرسة وتنتقمي.
في الحالة دي، ممكن نقترح عليكي تتفرجي على أفلام أو مسلسلات كوميدية، علشان تفرفشي وتروقي دماغك قبل ما الولاد يرجعوا وتقدري تستقبليهم بمرح وخفة دم تهوّن عليكي المسؤوليات، وممكن تتفرجي على أفلام رومانسية حيث إنها غايبة عن حياتك من ساعة ما خلفتي.
داي يوز
لو ناوية على فسحة بمعنى الكلمة، وعايزة تستغلي الوقت بجد، ممكن تحجزي في أي مكان تعملي فيه سبا وجاكوزي وكل الحركات دي كام ساعة تروقي نفسك، وترجعي بكامل إشراقتك ونضارتك للحياة تاني، وتاخدي الولاد من المدرسة بقى وأنتي رايقة.
طبعًا حاطين في اعتبارنا إنك مش عايزة تختاري مكان بعيد علشان عايزة تلحقي تروحي وترجعي قبل ميعاد رجوع الولاد من المدرسة، علشان كده هنقترح عليكي أقرب أماكن تعملي فيها داي يوز وهنقولك الأسعار:
فيلا بيل إيبوك
الفيلا موقعها استراتيجي لأنها على بعد 12 كيلو متر من وسط القاهرة في المعادي، علشان كدة تعتبر من الاختيارات المفضلة لكل اللي بيدوروا على عروض الداى يوز فى القاهرة من غير سفر، وسعر الداي يوز للشخص الواحد حوالي 700 جنيه.
نايس بارادايس
دي كمان في وسط القاهرة، موقعها في المنيل، والمواعيد من 9 الصبح لـ 6 بالليل، يعني هتلحقي تودي الولاد المرسة وتروحي براحتك، الأسعار بتبدأ من 600 جنيه للفرد بدون وجبة، و825 بإضافة وجبة، أما استخدام حمام السباحة ب 150 جنيه
طرق كتير تقدري تستغلي بها الوقت الذهبي والفرصة الوحيدة ليكي في اليوم اللي بيبقى الوقت فيها بتاعك أنتي، وحتى لو استغتليتيه بأبسط طرق، حسي بقيمة ده واحتفلي بالإنجاز علشان هيفرق معاكي في يومك والتزاماتك، وهيبقى عندك طاقة تواجهي بها المسؤوليات دي، وربنا يعينك ويكتر من أوقات فراغك.