مقتطفات من حوارات منار سليم زوجة الشهيد البطل أحمد المنسي بعد تكريم ذكراه في مسلسل “الاختيار”
بعد النجاح الكاسح اللي حققه مسلسل “الاختيار” بطولة النجم أمير كرارة في موسم رمضان 2020، كتير مكانوش يعرفوا مين هو الشهيد البطل أحمد المنسي، لكن بعد العمل الدرامي العظيم ده مصر كلها بتترحم على روحه اللي راحت دفاع عن الوطن.
من ساعت ما المسلسل إتذاع على قناة ON E وعدد من اللقائات الصحفية مع زوجة العقيد الراحل منار سليم كشفت تفاصيل جديدة مكناش نعرفها عن حياته وعن مسلسل “الاختيار”. كشفت السيدة منار سليم إن مخرج العَمَل بيتر ميمي زارها يتناقش معاها في تفاصيل المسلسل قبل ما يبدأ التصوير، مش بس كدا، خلال التصوير الفنان أمير كرارة كمان زارها عشان يعرف تفاصيل أكتر عن البطل الراحل عشان يقدر يجسدوا بشكل واقعي أكتر.
في لقاء مع برنامج “مساء dmc” زوجة أحمد المنسي وضحت إن سبب عدم وجود متعلقات شخصية للشهيد في بيته هي إن طاقم العمل طلبها عشان يقدروا يعملوا منها نسخ طبق الأصل من الساعة والأفارول لحد التيشيرتات العادية بتاعته.
“ردود الفعل التي تلقيتها على المسلسل ساحقة ولم أكن أتخيلها الحقيقة، وسبب عدم وجود متعلقاته الشخصية بالمنزل هي تواجدها مع طاقم العمل مثل الأفرول الخاص به وساعته مثلا، وطلبوها في العمل لكي يصنعوا منها نسخة طبق الأصل من أجل إضفاء مزيد من المصداقية، حتى التيشيرتات العادية الخاصة به، وهو أيضا كان شاعرا ورساما، وقبل التحاقه بالكلية العسكرية التحق بكلية الفنون الجميلة ولم يمكث فيها أسابيع حتى تلقى نتيجة تنسيق الكلية العسكرية، وهو كان يراعي ضميره وحقوق ربنا في كل حاجة”.
زوجة الشهيد أحمد المنسي، منار سليم.
إبن الشهيد المنسي حمزة اللي عنده 12 سنة وضح قد إيه هو بيكون سعيد بالمسلسل وإن ملايين المصريين بيشوفوه وفاكرين والده لحد اللحظة دي. وإنه عايز يكون ضابط صاعقة زي والده لما يكبر.
في لقاء تاني مع برنامج “على مسئوليتي” على قناة صدى البلد، السيدة منار سليم وضحت هي إزاي فخورة بالمسلسل وإنه قدر يرسم قصة الشهيد أحمد المنسي والإرهابي هشام عشماوي وإن واحد فيهم مات بيدافع عن بلده والتاني في السجن بيدفع تمن جرايمه.
من 3 سنين بالظبط، كلمة السيدة منار سليم هزت مصر كلها لما طلعت في الندوة التثقيفية الـ 26 للقوات المسلحة بمناسبة ذكرى انتصارات أكتوبر. لما اتكلمت عن تضحية زوجها في سبيل وطنه. هنا هي إدت تفاصيل كتير عن حياته وعن شخصه مصريين كتير مكانوش يعرفوها.