قبل ما جائحة فيروس كورونا المستجد تنتشر في العالم كله وتشل حركة الاقتصاد الدولية، مصر كانت متفائلة في أول ربع من سنة 2020 بعد ما معدلات البطالة كانت قلت لـ 7.2% من 8.1% في 2019 طبقًا لدراسات من الجهاز المركزي للتعبئة والإحصاء، لكن للأسف مع نهاية شهر أبريل إرتفعت المعدلات دي لـ 9.2% بعد ما تم تطبيق حظر التجوال وتم التشديد على حركة الانتقال لحماية المواطنين.
الجهاز طبقًا لرويترز بطل يجمع بيانات من على الأرض من نص شهر مارس اللي فات أول ما الحومة بدأت تطبق إجرائات احترازية للتقليل من انتشار عدوى “كوفيد-19″، اللي لحد دلوقتي أعداد المصابين بيها في مصر تخطت الـ 12 ألف.
من ساعت ما الأعداد بدأت تزيد والحكومة قررت تقفل المدارس والكافيهات والمطاعم والفنادق بالإضافة لإن حركة الطيران كلها وقفت لحد إشعار آخر.
خبراء اقتصاديين من حوالين العالم بيتوقعوا زيادة أعداد البطالة في العالم كله الفترة الجاية بسبب إجرائات الحظر اللي تم تطبيقها للوقاية من الفروس. الولايات المتحدة الأمريكية من الدول اللي عانت بشكل كبير مع الموضوع ده خصوصًا بعد زيادة نسب البطالة فيها لـ 14.7%، في أزمة اقتصادية هي الأكبر في تاريخها من ساعت الكساد الكبير في 1929.
انتبرايز اتكلمت مع د. باسم قمر من البنك الأوروبي للإنشاء والتعمير اللي توقع بإن أرقام البطالة هتبدأ ترجع لمعدلات 2019 في نص السنة الجاية.