عاجل: مصر أعلنت عن أخر إجرائات الحظر لفترة العيد وما بعدها
رئيس الوزراء المصري الدكتور مصطفى المدبولي أعلن عن أخر إجرائات الحظر اللي هيتم تطبيقها في عيد الفطر وما بعد العيد ولحد نص شهر يونيو. في خطابه للشعب، صرح مدبولي بإن العالم كله لظروف قهرية بدأ يتعايش جنبًا لجنب مع فيروس كورونا المستجد لحد ما يتم إيجاد علاج أو مصل ليه، وعشان كدا قررت الحكومة المصرية إلزام المواطنين بلبس الكمامات الوقائية في الأماكن المفتوحة والمغلقة وفي المواصلات العامة بدءًا من يوم 30 مايو، وفي البيان حذر رئيس الوزراء من العقوبة اللي هتطبق على أي حد بيخالف التعليمات دي.
في أسبوع العيد، اللي بيبتدي من الأحد 24 مايو ولحد الجمعة 29 مايو، كل المحلات التجارية، والمولات، والمطاعم، وأماكن الترفيه، والشواطئ، والحدائق العامة هيتم غلقها، وبالإضافة لده هيتم وقف كل وسائل المواصلات العامة وهتتمنع الحركة بين المحافظات.
أما بالنسبة لحظر التجوال في أسبوع العيد فهيبدأ من الساعة خمسة مساءًا من الأحد للجمعة، وصلاة العيد هتتذاع من مساجد الدولة من غير مصليين.
أما بالنسبة للأسبوعين اللي بعد العيد، الحظر هيكون من الساعة 8 مساءًا للساعة 6 صباحًا.
رئيس الوزراء صرح إن في نص شهر يونيو هيتم فتح النوادي والأنشطة الرياضية بشكل تدريجي، أما بالنسبة للمطاعم هتفضل تيك أواي الفترة دي، بس بعد فترة هيتم البدء في إجرائات فتحها تدريجيًا. وفي خطة لبدأ فتح الجوامع والمساجد بشكل تدريجي برضه.
في أخر البيان، رئيس الوزراء مصطفي مدبولي شجع المصانع المصرية على إنها تبدأ تصنع كمامات وقائية خصوصًا المعمولة من قماش وممكن يعاد استخدامها.