مسلسلات رمضان السنة دي مليانة مواضيع متنوعة من الرومانسية والجريمة والخيال العلمي للكوميديا والدراما والأحداث التاريخية اللي بترجعنا لسنين ورا. ومن ضمن الحاجات اللي لفتت نظر كتير مننا على السوشيال ميديا هي علاقات الحب المختلفة في دراما رمضان اللي أتنوعت بين علاقات حبناها وشدت انتباهنا وعلاقات غير سوية مليانة بالأذى والخيانة والضرر.
احنا اختارنا مجموعة من أكتر العلاقات المميزة في رمضان السنة دي، وقررنا نعرضها عليكوا ونشاركوا رأينا فيهم:
عمر وسكر النصابين اللي حبيناهم كلنا
مسلسل ب100 وش يعتبر ظاهرة في حد ذاته من أول أغنية تتر البداية اللي بترقصنا كلنا لحد العصابة العشوائية اللي على غير المتوقع بيتمنالها أغلب متابعي المسلسل النجاح في كل خططها. كله كوم وقصة حب آسر ياسين في دور عمر و نيللي كريم في دور سكر كوم تاني، الرومانسية الكوميدية والتوليفة المعمولة بين إبن الزمالك وبنت بولاق عملت قصة حب غير تقليدية خلتنا نعيش معاها ونتمنى نكون جزء منها.
المسلسل معمول بإتقان كبير بداية من السناريو اللي بيعكس الحوار الطبيعي بين الشخصيات وأداء الممثلين اللي حببنا في شخصياتهم الإستثنائية بكل حاجة حلوة ووحشة فيها، لإخراج كاملة أبو ذكري واهتمامها بالتفاصيل اللي بيبهرنا كل سنة أكتر من السنة اللي قبلها. متابعين ب100 وش عاملين ليه جروب مخصوص على الفيسبوك إسمه عشوائيات ب100 وش الجميلة، وتقدروا تلاقوا عليه كل تفاصيل المسلسل والكوميكس الخاصة بيه اللي مش هتخليكوا تبطلوا ضحك.
مراد السويفي وغالية
في مسلسل “ونحب تاني ليه” ظهر لينا كريم فهمي في شخصية مراد السويفي اللي بيحب ياسمين عبدالعزيز في دور غالية، والمكس في قصة حبهم بين رومانسية مراد وخفة دم غالية حققت تفاعل عالي على السوشيال ميديا واتصدرت كمان كذا تريند على اكتر من يوم.
مع تطور أحداث المسلسل قصة حب مراد وغالية بيقف قدامها عقبات كتيرة زي إن غالية بتكتشف إنه كان خطيب صاحبتها المفضلة واللي لسة بتحبه، والغيرة اللي بتسيطر على مراد وبتخليه يتحول في طريقة تعامله معاها.
في كل الاحوال المسلسل مادة خصبة لبوستات السوشيال ميديا والكوميكس اللي بتثبت نجاحه ووصوله للكل. والمسلسل من تأليف عمرو محمود ياسين، وإخراج مصطفى فكري، وبيشارك ياسمين عبدالعزيز في بطولته شريف منير، كريم فهمي، سوسن بدر، سمر مرسي.
ريهام وزياد في فرصة تانية
مسلسل فرصة تانية فيه أكتر من نموذج للعلاقات اللي لازم نتجنبها في حياتنا، واللي نفرت أغبنا من الشخصيات اللي بتعملها وكرهتنا فيها. أيتن عامر عاملة واحدة من أكتر الشخصيات المستفزة في رمضان السنة دي وهو دور ريهام. ريهام في المسلسل بتحب زياد اللي بيقوم بدوره أحمد مجدي وبيحب ملك اللي بتقوم بدورها ياسمين صبري. سلكت ريهام كل الطرق علشان توصل لقلب حبيبها في المسلسل وتاخده من حبيبته زي إنها مثلاً بتتسبب في أول المسلسل فى فسخ خطوبته، وبتطلب منه الزاوج وكمان بتعرض عليه مقابل مادي علشان يوافق.
ورغم من إنه بيسيبها أكتر من مرة على مدار حلقات المسلسل إلا إنها بتحاول ترجعله في كل مرة بالكدب والحيلة، ووصلت إنها تحاول تقتل حبيبته وتقتله بس بردو من غير فايدة.
مريم ومدحت في فرصة تانية
ومن ريهام اللي بتجري ورا زياد وعوزاه يرجعلها بأي ثمن لمريم الزوجة الضعيفة اللي بتلعب دورها هبة مجدى. شخصية مريم بتدي نموذج للنساء السلبيات اللي بتقبل الإهانة والضرب والخيانة تحت مسمى الحب، فبنلاقي في أول حلقات المسلسل جوزها مدحت اللي بيلعب دوره دياب بيخونها وبيضربها وبياخد بنتها منها وهي مستمرة معاه ومستحملة كل ده، لحد ما بتتغير شخصيتها وبتنتقم لنفسها.
انتقام مريم حقق تفاعل كبير على السوشيال ميديا وده لأن الجمهور كان مستغرب ومُستفز من سلبيتها اللي للأسف موجودة في بعض الأشخاص الموجودين في حياتنا اليومية. تعليقات الجمهور كان أغلبها بيتمنى إن تصرفات مريم وتحول شخصيتها ممكن يأثر في اي حد بيتخلى عن حقوقه وتخليه يراجع نفسه ويصون كرامته من أي أذى بدافع الحب.