مع مرور السنين والأحداث اللي بتحصل في حياتنا، وخصوصًا لو كانت وحشة، كل لما بييجي عليك مناسبة زيّ شهر رمضان، بتبدأ تحس بالتدريج بفقدان روحانيات معينة، أجواء كنت بتحس بها زمان بقوة ودلوقتي خفت أو بقت قليلة لأسباب كتير، ممكن تكون الأسباب دي هي اللي بتمنعنا نعيش فرحة أي حاجة جديدة بنفس قوة وأحاسيس زمان. فرحة دخول العيد وأنت في ستة ابتدائي، أكيد مش هي نفس الفرحة وأنت عندك ٣٠ سنة أو عندك ٥٠.
إحساسك بالفرحة بيختلف واستقبالك لها كمان بيختلف، ممكن تكون بسبب فقدان شخص عزيز عليك فقدته قبل دخلة رمضان أو إنك تكون فقدته أصلًا في نفس الشهر من سنين، وكل لما بييجي عليك المناسبة دي بتحس بحزن وبتفتكره، خصوصًا لو الشخص ده كان هو اللي بتشاركه كل التفاصيل الموجودة في رمضان.
بس برغم كل ده، رمضان والعيد وكل المناسبات اللي المفروض نبقى فيها مبسوطين، بتعتبر فرصة كويسة أوي إننا نرجّع حاجات انطفت جوانا أو أثرت فينا على مدار السنين اللي فاتوا.. وبما إننا على مشارف وصول رمضان وخلاص هانت وكلها أيام ونستقبل أحلى 30 يوم في السنة، جمعنا لكم شوية نصايح بسيطة تقدر تعملها مع نفسك أو مع الناس اللي حواليك وهتدخلك في مود وأجواء الشهر الكريم.
اشتري زينة رمضان
علق زينة رمضان في بيتك، اشتري فرع نور أو مفرش مرسوم عليه بوجي وطمطم أو عليه بكار، وعلقّها في أكتر مكان بتحب تقعد فيه في البيت. التجديد في البيت حتى لو بحاجات بسيطة بيساعد النفسية بشكل إيجابي، ولو أنت تعرف تعمل الزينة بإيدك أو لك في الحاجات اليدوية، هتبقى فرصة إنك تخرج طاقة سلبية وأنت بتعمل حاجة بتحبها وتقدر تعرف طريقة عمل الزينة من هنا.
وممكن كمان تشتري فوانيس صغيرة ووزعها على الأطفال في الشارع، ولو حابب إنك تشارك في تزيين الشارع بتاعك سواء بفلوس أو إنك تعلق معاهم الزينة، اعمل كده.
خلي البيت كمان يستعد
هيأ بيتك لاستقبال الشهر، اشتري الحاجات اللي بتحب تاكلها في رمضان، زيّ القطايف أو الكنافة أو قمر الدين. احنا مش بنقول اشتري بكميات كبيرة أو بنشجع على المبدأ الاستهلاكي، بس في أكلات مرتبطة بالشهر ده ولو أنت جبتها أكيد هتحس بفرق أو تغيير، وياريت لو أنت اللي عملت الأكلات دي أو ساعدت حد فيهم، ده بيفرق عن لو جيت كلت على الجاهز.
كلم حبايبك
كلم حد في الموبايل وبلاش سوشيال ميديا، حد من أهلك أو أصحابك ماتعرفش عنه حاجة من فترة كبيرة وقول له كل سنة وأنت طيب واتفقوا على يوم تتقابلوا فيه حتى لو هتتمشوا في الشارع، هيفرح إنك افتكرته بعد السنين دي وأنت كمان هتفرح!
استعد للخير
رمضان معروف بشهر الخير لإن كل الناس بتحب تساعد فيه والأعمال الخيرية بتكتر، حاول تقدم مساعدة لحد واشتري له حاجات رمضان، وزي ما بتسعد للأجواء الرمضانية استعد كمان للخير قبل حتى ما الشهر يبدأ علشان تستقبله وأنت مفرح غيرك.
غنوا وقولوا شهر بطوله
من الحاجات اللي بتعيشك أجواء رمضان حتى قبل ما تبتدي هي الأغاني، شغل أغاني رمضان اللي كنت بتحب تسمعها وأنت صغير في البيت، زيّ “مرحب شهر الصوم مرحب” أو “أهو جيه يا ولاد” أو أغنية فؤاد المهندس “الصيام مش كده” أو الأغاني اللي بتتعمل في رمضان سنويًا وبجانب الأغاني في مسلسلات برضه كانت فيها أجواء رمضانية ممكن تشغلها وتتفرج عليها.
عيش الأجواء على أرض الواقع
انزل اتمشى في شوارع مصر القديمة زيّ المعز وخان الخليلي والحسين، واتفرج عليهم وهما بيستعدوا وبينصبوا المكان اللي بيعمل الكنافة والقطايف، والمحلات بتبدأ تطلع الفوانيس وحاجات رمضان اللي هتتباع، وممكن تساعد كمان في موائد الرحمن اللي هتتعمل.
صفي القلوب
خد على نفسك وعد إنك مع بداية دخول الشهر الكريم إنك هتحاول على قد ما تقدر تقلب في دفاترك القديمة وتشوف لو في حد شايل منك أو خذلته في يوم من الأيام إنك تصفي القلوب وتراضيه، الموضوع ده هيفرق في النفسية جدًا واحنا على مشارف الشهر الكريم.
آخر حاجة: رمضان فرصة لتجديد قلبك وروحك ونفسيتك، وممكن يبقى فرصة إننا نجدد علاقتنا مع ربنا أو مع نفسنا أو حتى مع الناس اللي حوالينا.. حاول تستغلها.