مش أول مرة دولة الإمارات تعمل كل جهدها علشان تعدي من أزمة كورونا بأقل الخسائر، ماننساش الجايزة اللي اتقدمت تقديرًا ليها، وللدور اللي عملته لدعم وإغاثة كل المحتاجين حول العالم والمتضررين من جائحة كورونا، وأخر حاجة قدمتها لبلدها هو نظام EDE، واللي يعتبر وسيلة جديدة أشبه بالـScan اعتمدتها “صحة أبو ظبي” من خلالها هتقدر تتعرف على المصابين بفيروس كورونا بدقة عالية.
ومش بس كده، ده ممكن يتعرف نسبة احتمالية تعرض الشخص بالإصابة، وده عن طريق إنهم بيقيسوا الموجات الكهرومغناطيسية اللي بتتغير في حالة وجود جزئيات للحمض النووي الريبي (RNA) للفيروس في جسم الشخص، وبالتالي هتلاقي نتائج فورية عن طريق عمل مسحة للناس المحتمل إصابتهم عن بعد.
النظام بدأ تفعيله النهارده بعد فترة تجريبية أثبتت كفاءة التجربة، لإنها تمت على أكتر من 20 ألف شخص، ووصلت دقتها لـ93.5% في تحديد الأشخاص المصابين، و83% في تحديد الغير مصابين. ودي كانت من ضمن الاستراتيجية المتكاملة لمكافحة الجائحة، وتعتبر خطوة مهمة جنب استمرار التطعيمات ومسحة الـ PCR كمان. EDE تعتبر اختصار لمعهد أبحاث أبو ظبي التابع للشركة العالمية القابضة.
وهيتم تطبيق النظام على المولات، والمناطق السكنية اللي لسه بتخضع للفحص، وعلى منافذ الإمارة الجوية والبحرية. وأضاف وكيل دائرة الصحة الدكتور “جمال محمد الكعبي” إن النظام ده بجانب رؤية الدولة لتسخير التكنولوجيا الحديثة علشان نبتكر حلول تقدر إنها تحول التحديات لفرص بعد كده.