فترة العشرينات ممكن تبقى أحقر وأحلى فترة في حياتك، وده على حسب أنت عشتها ازاي أو استغلتها في إيه، وفي حاجات بعينها لو ماعملتهاش قبل ما تتم التلاتين هيبقى من الصعب عليك إنك تعملها بعد السن ده، أو هتحس إنها تقيلة على قلبك، لإن فترة العشرينات أو الفترة اللي قبل التلاتين على طول، المفروض إنها الفترة اللي بتكتشف فيها نفسك وبتعرف أنت هتعمل إيه في حياتك اللي جاية، وعلى أساسه بتجرب حاجات وبتفشل كتير وبتقع أكتر، بس بغض النظر أنت هتعيش الفترة دي ازاي، في حاجات لازم تعملها علشان تبدأ التلاتينات بشك صح.
ورغم إن السن هو مجرد رقم، لكننا دايمًا بنكون مطاردين بفكرة إن العمر بيفوت مننا واحنا ماعملناش حاجة، أو فكرة سن التلاتين مرتبطة معانا بالتقدم في العمر وعمرنا ما فهمنا السبب، فخلينا نقول إن دي حاجات تعملوها عامةً ومش لازم تربطوها بالسن.
اتخلص من أي علاقة مؤذية
أو اللي بيقولوا عليها “Toxic Relations” لازم تتخلص من كل العلاقات المؤذية في حياتك، العلاقات اللي بتاخد ومش بتدي، وبتسبب ليك ألم ومشاكل نفسية بتفضل تعالج فيها باقي حياتك، فلازم تقطع صفحة الناس دي من حياتك وتاخد القرار، لإنك لو ماقررتش تعمل ده دلوقتي، هتلاقي نفسك كل لما تكبر القرار هيبقى أصعب عليك.
سافر لوحدك
لازم تاخد قرار السفر لوحدك لإن فيه فوايد كتير نفسية هتعود عليك وهيغير من شخصيتك كتير، وهيعتبر فرصة كويسة واختبار حقيقي لتحملك المسئولية، فسافر علشان “أنت مش شجرة” زيّ ما بيقولوا.
افتح مشروعك الخاص
احنا مش بنقولك انزل افتح شركة، حتى لو كان مشروع صغير وبسيط، إنك تبقى مدير نفسك تعتبر تجربة مختلفة، وهتخليك عايش من غير ضعط نفسي إنك ممكن تخسر وظيفتك في أي وقت، ببساطة مش هتبقى تحت رحمة أي حد.
خليك دودة قراءة
يمكن ده اللي يعتبر أكتر استثمار حقيقي، إنك تستثمر في نفسك حاجة مهمة وهتفضل تحصد نتايجها طول حياتك، سواء على مستوى العلاقات الاجتماعية أو في الشغل، القراءة بتبني العقول، وبتاخدك في أماكن عمرك ما كنت تتخيل إنك تروحها، وهتخليك إنسان متحضر تعرف تتعامل مع الغير، اقرأ في كل حاجة وعن أي حاجة.
ارمي كل علب السجاير
مش بس السجاير، لأ وأي عادة سيئة تانية في حياتك مش عارف تتخلص منها، جيه الوقت إنك تسيطر عليها وتحجمها، لإنك لو ماسبتهاش وأنت في السن ده، عمرك ما هتعرف تسيبها وأنت عندك أربعين أو خمسين سنة.
غير دول في حاجات تانية، زيّ إنك تتعلم حاجة جديدة، تنفع تبقى هواية ليك بعد كده في أوقات فراغك لما تكبر، زي ّالعزف مثلًا أو الطبخ. أو إنك تحوش فلوس حاجة مهمة لمستقبلك بعدين، وتخلي الرياضة جزء مهم من حياتك، فهي تعتبر برضه من الحاجات المهمة اللي لازم تتعمل قبل “التلاتين” وبعديها كمان.