في الساعات اللي فاتت شوفنا فرح ” كاميليا الدفراوي” بنت الفنانة علا غانم وبنت رجل الأعمال ” وليد الدفراوي”، علا وبنتها اتصدروا السوشيال ميديا وكل محركات البحث، من قبل ما الفرح يبدأ أصلًا، وده من وقت ظهور علا غانم بإطلالة جديدة على السوشيال ميديا بعد غياب سنوات عن الساحة الفنية، واللي اتعرف بعدها إنها رجعت من أمريكا علشان فرح بنتها.
كاميليا درست بقسم العمارة في كلية الهندسة بجامعة كاليفورنيا الجنوبية، هى بنت علا الكبيرة وعندها أخت تانية اسمها فريدة، عاشت مع والدتها سنين كتير في أمريكا، وأعلنت خطوبتها سنة 2019 على عبد الرحمن، ابن رجل الأعمال علاء رجب اللي بيمتلك جامعة فاروس الخاصة في اسكندرية. اتعرفت كاميليا عند الجمهور وقت ما شاركت وكسبت في مسابقة اتعملت لصالح أكبر شركات المشروبات الغازية.
لما ظهرت في الفرح كل الناس اتكلموا عن الشبه الكبير بينها وبين مامتها الفنانة علا، غانم وعن إطلالتها البسيطة اللي خطفت الأنظار، فستانها كان من محل أزياء Monique Lhuilier للمصممة الفلبينية مونيك ليولير.
والحقيقة إن الفترة دي من السنة بنشوف حالة من نشاط الأعراس اللي بيتقال عليه” موسم أعراس الوسط الفني” لإنه لسه شايفين الأسبوع اللي قبله فرح محمد فراج وبسنت شوقي اللي لفت الأنظار وحضره مجموعة كبيرة من الفنانين، ومن كام يوم شوفنا برضه فرح ابن الفنان مصطفى قمر، واللي أحيى الفرح وسط مجموعة كبيرة من نجوم التسعينات منهم: حميد الشاعري، وهشام عباس، وإيهاب توفيق.
